Büro 1969-cu ildən fəaliyyət göstərsə də, bir otağı da yoxdur.

Bu sözləri Azərbaycan Yazıçılar Birliyinin Ədəbiyyat təbliği bürosunun direktoru Nazim Əhmədli büronun fəaliyyəti ilə bağlı Axar.az-a danışarkən deyib:

"İndi yaydı, hamı ezamiyyətdədir. Hər il olduğu kimi, bu il də tədbirlərə oktyabr ayından start verəcəyik. Bu tədbirləri əsasən orta məktəblərdə keçirməyi nəzərdə tutmuşuq. Əslində, büdcəsiz bir təşkilat olduğunu nəzərə alsaq, çox iş gördüyümüz aydın olar. Biz reklama çox yer vermirik. Büroya maliyyə vəsaiti ayrılması üçün dəfələrlə nazirliklərə müraciət etmişik, məktub göndərmişik, ancaq faydası olmayıb.

40-a yaxın məktəb və kollecdə, onlarla dövlət idarəsində, nazirliklərdə yazıçı və şairlərlə görüşlər keçirmişik. Hər görüşdə bizə 100 manat pul ayırırlar. Onun 40 manatını yazıçıya, şairə, 20-30 manatını əlavə xərclərə, yerdə qalanını da vergiyə veririk.

30 və daha çox yazıçı və şairə Qarabağ mövzusunda yazılan əsərlərə görə mükafat vermişik. Mükafatı mən təsis etmişdim.

Bədii ədəbiyyatın təbliği bürosu 1969-cu ildən fəaliyyət göstərsə də, büronun bir otağı da yoxdur. Mən evdə oturub işləyirəm. Tək işçi də özüməm. Demək olar ki, heç nəyə işləyirəm, yəni gəlir yoxdur".