Bakı Beynəlxalq Multikulturalizm Mərkəzində Azərbaycan Yaradıcılıq Fondunun www.sim-sim.az mədəniyyət portalının təqdimat mərasimində akademik Kamal Abdulla Yaradıcılıq Fondunun gələcək planlarından da danışıb.

Axar.az xəbər verir ki, yazıçı Azərbaycanın regionlarında olan mədəni xadimlərə, tələbə və gənclərə qayğı ilə yanaşılmalı olduğunu, onların qeydinə qalmaq gərəkdiyini deyib:

"Azərbaycan regionlarını gəzərkən məni ən çox təəccübləndirən nüans regiondakı gənclər oldu. Universitetə daxil ola bilməyib, bunu faciə kimi qarşılayan, bazarların ətrafında, məhəllələrdə avaralanan gənclər. Onlara başa salmaq lazımdır ki, universitetdən kəsilmək dünyanın ən böyük faciəsi deyil. Mən bu gənclərin qayğısına qalmağın tərəfdarıyam. Bu gənclər oxumaq, bilik sahibi olmaq, cəmiyyətdə özlərinə yer tutmaq istəyir. Məhz bu gənclərə kömək etmək lazımdır. Bununla bağlı Yaradıcılıq Fondu artıq işə başlayıb. Biz regionlarda, ucqar rayonlarda mərkəzlər yaradacaq və o gəncləri bir yerə yığacağıq. Kitabxanalar, kurslar təsis edəcək, gənclərə təhsil verəcəyik. Onlar uzaq düşdükləri universitetlərlə birbaşa ünsiyyətdə olacaqlar. Onlara diplom verə bilməsəm də, öz imzamla sertifikat təqdim edəcəyəm".