Ana səhifə Reportaj |
"Açıq dərs" layihəsində
Şairlər nəslindən olub ölkənin aparıcı dramaturqlarından sayılan, "İran teatr tarixi" (1960) kitabını ərsəyə gətirən, əsasən öz ssenariləri üzrə çalışan, İran kinorejissorluğunun liderlərindən biri Bəhram Beyzayinin "Yad adam və duman" (1970) filmi ekranda reallığı əks etdirməklə vesternləşməyə qarşı çıxdı.
"Leysan"
Mənəvi gücü heyvərəliyə, zorakılığa qarşı qoymaqla xırda adamı qalibə çevirmək bacarığını ustad Çarli Çaplinin peşəkar üslubundan yetərincə bəhrələnməklə, özünün yozumunu uğurla tətbiq edən Bəhram Beyzayenin məzlumların istibdad üzərində qələbəsinin ekran modelini öngörənliklə yaratdığı "Leysan" (1971) filmində kirayədə yaşayan kasıb müəllim Hikmətinin şagirdi Müseyibin qardaşının dərsdən uzaqlaşdırılmasından şikayətə gələn bacısı Atefeyə vurulması barədə şayiələrin yayılması, onların görüşünün quş kimi hündür budaqlara "qonan" şagirdlər tərəfindən izlənilməsi, bu eynəkli xırda adamın mənəviyyatlı, gözəl qızı qan içində üzən, əllərinə tüpürüb saçına sığal çəkən harın qəssab Rəhim ağadan xilas etməsi minillik hoqqa teatrı estetikası hesabına neorealizm cərəyanında uğurla həyata keçirilir.
"Qarğa"
Öz ssenarisi əsasında ərsəyə gətirdiyi "Qarğa" filmində rejissor nitqi qüsurlu şagirdlərinə dərs deməkdən, pantomim hərəkətlərlə onlara quşları, həmçinin qarğanı göstərməkdən zövq alan, kasıb sosial zümrədən çıxmış müəllimə Asya (Purani Məsumi) ilə xasiyyətcə ondan tam fərqli əri, daim sosial müşküllər axtaran telejurnalist Əsalətin (Hüseyn Pərvəreş) fotoşəkli elanlarda çap olunan itkin düşmüş gənc qızın axtarışına qoşulmalarından söz açır. Dünyaya qüsurlu uşaq gətirməkdən qorxan Asyanın xatirələrini yazdığı, İkinci Dünya Müharibəsində tibb bacısı olub əllərini don vurmuş, ərini cəbhədə itirən, bütün günü kartlarla fala baxan, köhnə vallarda səslənən musiqidən təsirlənən, məzarlıqda gəzməyi sevən qayınanası mistik, sürrealist personaja çevrilir. Asyanın qayınanasının daim sinəsi üzərində gəzdirdiyi açarla qapısını açdığı otaqda yalnız keçmişin əşyalarını, gəlinlik libasını, o cümlədən, köhnə fotoaparatı görməsi, iri qum saatını çevirməsi, yuxularla reallığın qovuşması mistik sürrealizmi gücləndirir. Finalda vaxtilə ərinin çəkdiyi gənclik fotoşəklini axtarış elanlarında çap etdirməsi üzə çıxan qarının atasının indi qarğaların çığırışdığı bağında gəzmək istəyinin yerinə yetirilməsi, bütövlükdə film boyu passiv hadisəlilik sisteminin zaman-zaman Avropa kinosunda gündəmə gələn, freydizmin ekran ekvivalenti sayılan sürrealizm cərəyanında reallaşması dünya kinosu ilə ünsiyyətdə balans yaradır.
"Tara balladası"
Təəssüf ki, İran İslam İnqilabından sonra müharibə səbəbindən kino istehsalının səngiməsi ilə yanaşı, keçmişin peşəkarlarının birmənalı olaraq işdən uzaqlaşdırıldığı keçid dövrünün tezliklə başa çatması ilə yenidən sənətə qayıdan Bəhram Beyzayenin "Tara balladası" (1980) ustad sənətkar yaradıcılığında növbəti mərhələyə çevrildi. Babası dünyasını dəyişdikdən sonra iki uşağı ilə yaylaqdan doğma kəndinə qayıdan gənc ana Taranın qarşılaşdığı olaylar reallıqla irreallığı üzləşdirir. Və qəhrəmanlıqla dolu tarixi keçmişin daim gündəmdə qalması, yüksək peşəkarlıqla əyalət təfəkkürünə yuvarlanan sentimentalizmə, hissiyyat gerçəkliyinin önə çəkildiyi romantizmə uymadan neorealizm çərçivəsində ekrana gətirilir.
Taranın babasından qalma məişət, təsərrüfat əşyalarını qonşulara paylaması, qədimi qılınca isə bir kimsənin yiyə durmaması dövrülüklə əbədiliyi qarşılaşdırır. Kənd evinin astanasında görünən atlı süvarinin tayfası tərəfindən məhz bu qılıncı əldə etmək üçün göndərildiyini bildirməsi ilə mifik mövzunun önə keçməsi hadisələrin minilliyin məkan kontekstində çözülməsinə imkan yaradır. Qədim qılıncı alıb getdikdən sonra geriyə qayıdan süvarinin Taraya vurulduğunu bildirməsi tarixin zaman sərhədini şəffaflaşdırmaqla sənətkar təxəyyülünün genişliyini təsdiqləyir.
"Yezdigerdin ölümü"
Bəhram Beyzayenin tarixi mövzuda ərsəyə gəlməklə müəllifin peşəkar üslub cəbbəxanasının zənginliyini göstərən "Yezdigerdin ölümü" (1982) filmi romantizmlə neorealizmin qarışığına çevrilir. Ərəb xilafəti ilə on dörd illik mübarizədən sonra həyatına gəncliyində son qoyulan Sasanilər sülaləsinin sonuncu şahı III Yezdigirin (632-651) hakimiyyətinin mühitində mənəvi dəyərlərin, insani münasibətlərin, ideyasız idarəçiliyin iflası humanizm yozumunda, sosial-siyasi müstəvidə sərt üslubda önə çəkilməklə neorealizm elementlərini yaşatsa da, tarixi keçmişə hissiyyatla bağlılıq romantizmə meydan açır.
"Başu – balaca qərib"
Bəhram Beyzayenin uzun fasilədən sonra da neorealizm cərəyanında ərsəyə gətirdiyi, mənəvi bağların, insani münasibətlərin ülviliyinin önə çəkildiyi "Başu – balaca qərib" (1985) filmi isə yüz minlərlə insanın tələf olduğu İran-İraq müharibəsi fonunda qadınların və uşaqların acı taleyindən məhz neorealizm cərəyanı müstəvisində bəhs edir. Fasiləsiz atılan düşmən mərmilərindən çadralı anasının diri-diri yanmasını, atasının, bacısının, müəlliminin ölümünü gözləri ilə görən yeddi-səkkiz yaşlı Başu adlı qaraşın oğlanın təsadüfən yanından keçən, daim nişangahdakı yük avtomaşınının banına qalxıb gizlənməklə baş götürüb boz səhradan ibarət müharibə bölgəsindən ölkənin şimalındakı yaşıllığa bürünmüş, əmin-amanlığın hökm sürdüyü kəndə gəlişi zaman-məkan ziddiyyəti yaradır. Bütün günü çəltik zəmisində çalışmaqla daim yanındakı balaca oğlunu və qızını qoruyan gənc ana Naiinin müharibə təhlükəsi yaşadığından göydə uçan şahinləri belə bombalar yağdıran hərbi təyyarə zənn edən Başuya doğma münasibət göstərməsi maraqlı bədii detallarla əksini tapır. Əri qazanc dalınca getdiyindən kənd dükanından nisyə mal götürməklə dolanan qadının qovsa da, talvara çıxdığından tuta bilməyib ot tayasında gizlənməklə səbirlə gözləyib ələ keçirdiyi Başunu çayda sabunlayıb çimizdirməsi Naiinin müqəddəs analıq münasibətinin təcəssümünə çevrilir. Beləliklə, ekran hadisələrinin nəbzini tutan rejissor yozumu sayəsində, ölkənin döyüş bölgəsi sayılan cənubundan gələn yad mədəniyyətli, özgə dilli və nəhayət, başqa iqlimli əyalətdən köçməyə məcbur olan Başunun düşdüyü mühit audiovizual təsvir ziddiyyətindən əlavə insani münasibətlər zəminində zənginləşdirilir. Kəndin yaşlılarının və hətta uşaqlarının yad, özgə saymaqla qəbul etmədikləri Başunu evində saxlamağın düşər-düşməzliyini dilə gətirən qonşu qadınlara məhəl qoymayan Naiinin üzməyi bilmədiyindən az qala çayda batan balaca qəribə tor ataraq balıq kimi tutması xilaskarlıq missiyasını uğurla obrazlaşdırır. Yaxın keçmişin acı xatirələrinə dalmaqla tez-tez tutmaları olan Başunu bir an belə diqqətsiz qoymayıb nazını çəkən Naii ana insanlıq missiyasını yüksək səviyyədə yerinə yetirir. Ananın özü də xəstələnəndə qorxuya düşən Başunun da onun qayğısını çəkməsi ünsiyyətin yaranışından xəbər verir. Beləliklə, yeni mühitinə isinişməklə dərdlərini unutmaqda olan Başunun tarlada uşaqlara, böyüklərə qarışaraq təsərrüfat işlərinə də kömək göstərməsi, çəltik tarlasında dərz bağlaması onu hər kəsə doğmalaşdırır. Və bu məqamda ehtimal ki, döyüş bölgəsindən qayıtması, bir qolunun da itirilməsi ilə vurğulanan ailə başçısının həmən qəbul etmədiyi Başunun ağac parçası götürərək, bütün ziddiyyətlərə rəğmən doğmalaşan yeni valideynləri ilə birlikdə çəltik tarlasına girən vəhşi qabana hücum çəkməsi ümumi düşmənə qarşı birliyin parlaq ekran həllini uğurla yaradır.
İran İslam İnqilabına rəğbət hissi ilə seçilən, ölkəsinin problemlərinin çözülməsinə daim çalışan Bəhram Beyzayenin "Başu – balaca qərib" filmi dramaturji qanunları dərindən bilən müəllifin vətəndaş mövqeyinin təsdiqidir.
"Səyahətçilər" və "İtlərin öldürülməsi"
Sonrakı illərdə Bəhram Beyzayenin lentə aldığı "Səyahətçilər" (1992) filmində maliyyə məsrəflərinin azlığı ucbatından hadisələrin cəmisi bir məkanda cərəyan etməsi bədii ifadə vasitələrini məhdudlaşdırmaqla ekran əsərini teatrallığa meylləndirir. Pul qazanmaq yolunda mənəviyyatın itirilməsini göstərən "İtlərin öldürülməsi" (2001) filmində isə Bəhram Beyzaye artıq ölkədə özünü göstərən korrupsiya problemini araşdırır. Filmdə mənəvi iflas mövzusunda əsər yazan Gülruhun (bu rolda rejissorun ikinci xanımı Müjdə Şəmsayi çəkilib) guya yeddi yüz əlli milyon tümən borcu olduğundan özxoşuna həbsxanaya girən fırıldaqçı əri Nasir Müasirin (Məcid Müzəffəri) yolunda var-yoxundan keçməsini, təcavüzlərə məruz qalmasını, depressiyaya düşməsini sosial müşkülə istiqamətlənən neorealizm cərəyanında bir daha nümayiş etdirir. Finalda gizli sevgilisi ilə ölkədən qaçmağa cəhd göstərən Nasir Müasir yetərincə cəzalandırılsa da, təfsilatlı arxitektonikasında belə neorealizmə sədaqətini qoruyan film "Yeni dalğa" cərəyanına, psixoloji dram janrına meyl göstərmir.
"Biz hamımız yatarkən"
"Biz hamımız yatarkən" (2009) filmində isə kommersiya kinosunun problemlərinə, sənətkarın maliyyə asılılığına, sponsorların müdaxiləsinə diqqət çəkən Bəhram Beyzaye özünün müşkülünü də mövzuya qatmaqla müəllif kinosuna xas fərdi üslub nümayiş etdirməklə "Neorealizm"dən "Yeni dalğa"ya sadəcə bir addım atır.
Tarix
2014.11.09 / 00:08
|
Müəllif
Aydın Dadaşov
|