Rusiya Donetsk vilayətinə nəzarət etmək istəyir. Eyni zamanda, bəzi sızmalar Rusiyanın Xerson və Zaporojye vilayətlərində güzəştlərə gedə biləcəyinə dair ehtimalları göstərir.

Axar.az xəbər verir ki, bu barədə “Voll Strit Jurnal” məlumat yayıb.

Məqalədə vurğulanır ki, Putinin bu istəyinin səbəbi 2014-cü ildən bəri Ukraynanın Donetsk vilayətində güclü möhkəmləndirilmiş şəhərlər, qəsəbələr və müdafiə istehkamlarından ibarət 50 kilometrlik istehkam zolağı yaratmasıdır. İllərlə davam edən cəhdlərə baxmayaraq, ruslar bu xətti yara bilməyiblər.

Müharibənin Araşdırma İnstitutuna istinadən jurnalistlər qeyd edirlər ki, mövcud tendensiya davam edərsə, rusların bu müdafiəni yarması üçün bir neçə il lazım olacaq. Buna görə də Putin Tramp ilə danışıqlar vasitəsilə döyüş meydanında əldə edə bilmədiyini qazanmağa çalışır.

“Əgər Putin danışıqlar yolu ilə bütün Donetsk vilayətinə nəzarəti ələ keçirə bilsə, bu, Rusiyanın Xarkov və Dnepropetrovsk vilayətlərinə hücum mövqeyini gücləndirəcək. Bu halda Ukrayna isə xüsusən əlverişsiz bölgələrdə təcili olaraq yeni müdafiə xətləri qurmaq məcburiyyətində qalacaq”, - nəşr qeyd edib.