Ukrayna Prezidenti Vladimir Zelenski avqustun 18-də ABŞ Prezidenti Donald Trampla Vaşinqtonda görüşməyi planlaşdırdığını açıqlayıb.

Axar.az xəbər verir ki, bu barədə Zelenski Tramp və Avropa liderləri ilə telefon danışığından sonra Teleqram kanalında yazıb.

"Bazar ertəsi Vaşinqtonda Prezident Trampla münaqişəyə son qoymağın bütün detallarını müzakirə edəcəyəm. Dəvətə görə minnətdaram", - o qeyd edib.

Zelenski əlavə edib ki, telefon danışığı saat yarım davam edib və mənalı olub. Onun sözlərinə görə, Tramp Rusiya Prezidenti Vladimir Putinlə danışıqların əsas məqamlarını açıqlayıb:

"Biz Trampın Ukrayna, ABŞ və Rusiya arasında üçtərəfli görüş təklifini dəstəkləyirik. Ukrayna əsas məsələlərin liderlər səviyyəsində müzakirə oluna biləcəyini və üçtərəfli formatın buna uyğun olduğunu vurğulayır".

O, həmçinin ABŞ-la birlikdə etibarlı təhlükəsizlik naminə Avropanın danışıqların bütün mərhələlərdə iştirakının vacibliyini bildirib.