"Güclü Gürcüstan" müxalifət koalisiyasının liderlərindən biri olan Aleko Elisaşvili Tiflis məhkəmə binasını yandırmağa cəhd etdiyinə görə terrorizmdə ittiham olunub.

Axar.az Unikal-a istinadən xəbər verir ki, müstəntiqlərin sözlərinə görə, 29 noyabrda, təxminən saat 4:00-da siyasətçi odlu silah və sursatla silahlanaraq oraya gəlib. O, çəkiclə pəncərəni sındırıb, məhkəmə binasına daxil olub, əşyalara və sənədlərə yanacaq töküb, sonra hər şeyi yandırmağa çalışıb.

Bu zaman məhkəmə icraçısı gəlib, Elisaşvili ona hücum edib və döyməyə başlayıb. Daha sonra daha iki məhkəmə icraçısı gəlib və o, silahını onlara qarşı istifadə etməyə çalışıb. O, təxminən 5-6 dəqiqə müqavimət göstərib, lakin sonda sakitləşdirilib.

Elisaşvili terror hücumuna cəhd etdiyinə görə 10 ildən 15 ilə qədər həbs cəzası ilə üzləşə bilər.