Ermənistanda ilk uşaqlarını dünyaya gətirən qadınların orta yaşı 29,2 ildir. Şəhərlərdə bu yaş 30,1, kənd yerlərində isə 28,3 ildir.

Axar.az xəbər verir ki, bu barədə Ermənistan Statistika Komitəsinin məlumatında bildirilib.

“Avrostat” (Eurostat) bu rəqəmin Şərqi Avropa ölkələri içərisində ən yüksək olduğunu açıqlayıb. Məsələn, Bolqarıstanda orta yaş 26,9, Polşa və Litvada 28,7, Çexiyada isə 29-dur.

Ermənistan Dövlət İqtisadiyyat Universitetinin İdarəetmə fakültəsinin dekanı Manuk Movsisyan yerli mediaya şərhində vurğulayıb ki, bu baxımdan ermənilər artıq qocalmış millət hesab olunurlar, bəzi hesablamalara görə isə hətta qocalırlar:

“1995-1996-cı illərdən əvvəl Ermənistanda yaşlı insanların nisbəti 7%-i keçməsə də (bu rəqəm BMT miqyasına görə demoqrafik cəhətdən gənc və qocalma arasında "hədd" hesab olunur), son 30 ildə daha az uşaq doğulur və orta ömür uzunluğu hər il artaraq əhalinin ümumi qocalmasına səbəb olur. 2026-cı ilin əvvəlində Ermənistanda 64 yaşdan yuxarı əhalinin nisbəti 10,1% təşkil edib. BMT-nin proqnozlarına görə, 2050-ci ilə qədər Ermənistanda 63 yaşdan yuxarı əhalinin nisbəti 24%-ə, 60 yaşdan yuxarı insanların nisbəti isə təxminən 33%-ə çata bilər. Ölkəmizdə 2025-ci ildə doğum nisbəti 1,7 idi, yəni biz hətta əvəzetmə nisbətinə belə çatmırıq”.

O bildirib ki, demoqrafik vəziyyəti yaxşılaşdırmaq və doğum nisbətini stimullaşdırmaq üçün 2014-cü ildən bəri Ermənistanda müxtəlif dövlət proqramları həyata keçirilir: gənc ailələr üçün mənzil, üçüncü və dördüncü uşaqların doğulması üçün müavinətlər və s. Lakin Movsisyanın sözlərinə görə, bu illərdə doğulan uşaqların sayının təhlili göstərir ki, bu, qısamüddətli təsir göstərib.

Rəsmi statistikaya görə, 2014-cü ildə Ermənistanda 43.031, 2024-cü ildə isə 33.593 doğum qeydə alınıb.