Xamenei fiziki cəhətdən mükəmməl sağlamlıq və rifah içində idi. Öz qaydalarını təqdim etdi, mən də narahatlıqlarımı və problemlərimi bildirdim. O da sözlərimi rahatlıqla dinlədi.

Axar.az xəbər verir ki, bu sözləri İran Prezidenti Məsud Pezeşkian ali rəhbər Müctəba Xamenei ilə görüşü barədə danışarkən deyib.

“Görüş çox yaxşı keçdi. Təxminən 7 saat onun yanında oldum və ölkənin gündəmində olan bütün məsələlər barədə müzakirə aparmaq imkanımız oldu. Bundan əlavə, sanksiyalardan irəli gələn problemlər barədə də danışdıq. Hökumətin və xalqın necə müqavimət göstərməsi, insanların dəstəyi, eləcə də birlik və həmrəylik bu görüşdə ətraflı müzakirə olunan digər məsələlər idi.

Bu gün düşmənin bütün planları ixtilaf və parçalanma yaratmağa yönəlib. Biz hər cür fikir ayrılığından çəkinməli, birlik və həmrəyliyi pozmağa xidmət edən hər hansı söz və ifadədən uzaq durmalıyıq.

Ola bilər ki, evin daxilində müəyyən müzakirələr və fikir ayrılıqları olsun, lakin dünyaya kənardan vahid bir səs və mövqe çatdıracağıq. Qoy düşmənlər bilsinlər ki, əziz İranımız müstəqilliyini, başucalığını və öz inanclarını müdafiə etmək üçün möhkəm dayanıb”, - o bildirib.

Qeyd edək ki, görüşdən heç bir foto və ya video yayımlanmayıb.