Rüfət Gəncinski Ded Xasanın təhlükəsizliyinə cavab verən şəxsin öldürülməsində günahkar bilinir.

Axar.az xəbər verir ki, bu barədə informasiyanı "İzvestiya" qəzeti özünün etibarlı mənbələrinə istinadən yayıb.

Mənbə hazırda İlqar Cəbrayılovun (Danabaş) ölümü ilə bağlı işin Aslan Usoyanın (Ded Xasan) işinə əlavə edildiyini bildirib.

Qeyd edək ki, İlqar Cəbrayılov Ded Xasanın ətrafında mühüm şəxslərdən hesab olunub. O, həm də Aslan Usoyanın təhlükəsizliyinə cavabdehlik daşıyıb. 52 yaşlı Cəbrayılov 2012-ci ildə özünün "Toyota Lənd Kruzer" avtomobili ilə işıqforda dayanan zaman killer tərəfindən pəncərədən açılan atəşlə qətlə yetirilmişdi. Bundan sonra isə killer hadisə yerindən qaçmışdı.

Qeyd edək ki, Rüfət Gəncinski (əsl adı: Ülfət Tağıyev) Rövşən Lənkəranskinin ətrafında ən mühüm şəxslərdən hesab edilir. Bir müddət öncə Rusiya hüquq mühafizə orqanları onu Ded Xasanı qətlə yetirən killerin qaçma planını təşkil etməkdə günahlandırmışdı. Ülfət Tağıyevin hələlik bununla bağlı əmri kimdən aldığı deyilməmişdi. Qanuni oğrunun özü də killerin adını çəkməkdən imtina etmişdi.