Parisdə polisin qətlinin şahidi "Assoşieyted Press" agentliyinə bildirib ki, o, çarxın KİV və internetdə belə geniş yayılmasını gözləmirmiş və buna təəssüf edir.

Axar.az xəbər verir ki, yanvarın 7-də Parisdə törədilmiş terror aktında bir polis – Əhməd Merabe də qətlə yetirilib. Mühəndis Cordi Mir deyib ki, təlaş içərisində idi və ağılsız refleksə qapılaraq videonu sosial şəbəkəyə yerləşdirib.

O bildirib ki, əvvəlcə terrorçuların hücumunu bankı qarət kimi başa düşüb. Ona görə də videonu diskə köçürüb polisə verib. Sonra isə Feysbukdakı 2500 dostu ilə paylaşıb: "Mən kiminləsə danışmalı idim. Evdə tək idim və videonu Feysbuka qoydum. Bu, səhv addım idi".

15 dəqiqədən sonra Mir videonu silib, ancaq artıq gec idi – digər istifadəçilər onu paylaşmağa macal tapmışdılar. Kimsə hətta video çarxı Yutubda verləşdirib. Heç bir saat keçməmiş Mir özünün çəkdiyi videonu telekanalda görüb.

"Le Figaro" nəşri isə bu videodan kəsilmiş kadrı "Müharibə" başlığı ilə manşetə yerləşdirib.