Bakıda yaxalanan gürcü vətəndaşlarının üzərinə baxış keçirən zaman 8 qr-a yaxın tiryək də aşkar edilib. Mingəçevirdə isə mağazadan 8 kq yağ oğurlanıb.

Axar.az Daxili İşlər Nazirliyinin rəsmi saytına istinadən xəbər verir ki, Bakı şəhər BPİ-nin əməkdaşlarının həyata keçirdikləri əməliyyat-axtarış tədbirləri nəticəsində Mərdan Qənbərovun və Əlif Orucovun cibindən pul oğurlayan Gürcüstan vətəndaşları - əvvəllər məhkum olunan 38 yaşlı Georgia Goqolodze, 35 yaşlı Mindia Kereselidze, 34 yaşlı David Eristavi və 34 yaşlı Guram Geduadze tutulublar. Üzərlərinə baxış zamanı ümumilikdə 8 qr-a yaxın tiryək də aşkar edilərək götürülüb.

Abşeron rayon Polis Şöbəsinin əməkdaşları isə oğurluq etməkdə şübhəli bilinən 3 nəfəri yaxalayıb. Saxlanılan Sumqayıt sakinləri 26 yaşlı Xəqani Şirinov 22 yaşlı Xanbaba Novruzov və Cavid Quliyev oğurluqda şübhəli bilinərək yaxalanıblar. İlkin istintaqla müəyyən edilib ki, saxlanılan şəxslər Elmar Bağırova məxsus mağazaya bir neçə dəfə giriblər. Saxlanılanlar ifadələrində əldə etdikləri pulları şəxsi istifadələri üçün xərclədiklərini bildiriblər.

Mingəçevir şəhərində isə 1 kişi və 2 qadın əlbir olaraq mağazadan 8 kiloqram yağ oğurlayıblar. Oğurluq hadisəsi anbaan müşahidə kamerasına düşüb. İradə Niftaliyevaya məxsus mağazaya gələn 3 nəfərdən biri, orta yaşlı kişi satıcının diqqətini qadınlardan yayındıraraq ondan malların qiymətini soruşmağa başlayıb. Bu zaman qadınlar özlərini nəsə alırmış kimi göstərərək soyuducunu açıb və yağ qutusunu götürüblər. Sonra oğrular bir neçə ərzaq da alaraq mağazanı tərk ediblər. Hazırda həmin oğrular axtarılır.

Hər üç faktla əlaqədar Cinayət Məcəlləsinin müvafiq maddəsi ilə cinayət işi başlanıb, araşdırmalar davam edir.