"ABŞ və onun Avropa üzrə müttəfiqləri - Fransa və Almaniya Ukrayna böhranının tənzimlənməsi istiqamətində intensivliyi xeyli gücləndiriblər".

Bunu Axar.az-a açıqlamasında politoloq Elman Nəsirli Rusiya, Fransa, Almaniya və Ukrayna liderlərinin bu gün Berlində baş tutacaq növbəti görüşünü şərh edərkən deyib.

Politoloqun sözlərinə görə, danışıqların konfidensiallığının qorunması Almaniya və Fransanın irəli sürdüyü təkliflərin özündə bir sıra yeni əsasları ehtiva etməsindən xəbər verir:

"Görüşlərin keçirilməsi münaqişənin hazırkı vəziyyətindən daha çox dondurulmasına xidmət göstərir. Hadisələrin gedişatı sübut edir ki, vəziyyətin bu cür saxlanılması müharibənin daha da alovlanmasına gətirib çıxara bilər. Münaqişənin istisi Avropanın digər ölkələrinə də gəlib çata bilər. Bu nöqteyi-nəzərdən belə görüşlərin əhəmiyyəti olduqca böyükdür. Heç bir nəticə hasil olmasa, belə olan vəziyyətdə ABŞ-ın Ukraynaya silah vermək təklifi də reallaşa bilər. Avropa təmsilçiləri hesab edirlər ki, bu cür vəziyyət artıq Ukraynadakı böhranın yeni bir mərhələyə keçməsinə gətirib çıxara bilər. Ona görə də bu son təmaslara xüsusilə böyük önəm verilir. Ukrayna problemi ilə bağlı danışıqlarda tərəflərin ortaq məxrəcə gəlməsinə dair ümidlər var. Əgər bu alınmasa, hadisələr ən qara və mürəkkəb ssenari üzrə inkişaf edə, belə olan halda isə Rusiyanın konfliktə artıq kənardan deyil, açıq şəkildə müdaxiləsi baş qaldıra bilər. Nəticədə, Avropanın işə qarışması ilə üçüncü dünya müharibəsi qaçılmaz ola bilər. Bu baxımdan da son dərəcə gərgin danışıqlar prosesində müəyyən kompromisin əldə olunması ehtimalları hazırda daha çoxdur".

Xatırladaq ki, bu gün Berlində Rusiya, Ukrayna, Almaniya və Fransa liderlərinin görüşü gözlənilir.