Artıq 7 ildən çoxdur ki, Azərbaycan Yazıçılar Birliyi üçün dövlət tərəfindən ayrılan torpağın əriyərək göz-görəsi yoxa çıxması müşahidə olunur.

Axar.az-a bu haqda xəbər verən bir qrup yazıçı 2008-ci ildə yazıçıların mənzil şəraitinin yaxşılaşdırılması üçün dövlət tərəfindən Xətai rayounu, G.Şıxliniski küçəsi, 2942-ci məhəllədə ayrılan torpaq sahəsi ilə bağlı qalmaqalın böyüdüyünü deyiblər:

"Mənzilə ehtiyacı olan yazarların dəfələrlə AYB rəhbərliyi qarşısında bu məsələni gündəmə gətirmək cəhdi də birmənalı olaraq öz həllini tapmayıb".

Əməkdaşımız məsələ ilə bağlı AYB-də olub. Birliyin mənzil komisiyyasının sədri, AYB sədrinin müşaviri Rauf Aslanov binanın tikilməsinə görə cavadeh olmadığını deyib:

"Bu, komissiya sədri kimi mənim səlahiyyətlərim daxilində deyil. Biz Mənzil komissiyasının üzvü olaraq mənzillərin bölünməsi işinə baxırıq. O ki qaldı AYB üzvləri üçün torpaq sahəsinin olmasına, bu həqiqətdir. Düzdür, həmin sahə qeyri-qanuni olaraq nə vaxtsa iki işbaz tərəfindən özəlləşdirilmişdi. Lakin biz məhkəmə yolu ilə həmin ərazini geri qaytara bildik və kooperativ binanın tikilməsi, səndələrin hazırlanması başqa adama həvalə olundu. O da düzdür ki, həmin yer kooperativ evin tikilməsi üçün verilib. Yeri hər hansı bir şirkətə güzəşt edib oradan 10 faiz mənzil götürmək düzgün olmazdı".

Müşavir bu məsələdə kimin cavabdeh olduğunu açıqlamasa da, araşdırmamızın sonucu olaraq bu adamın AYB sədrinin müavini, Nazim İbrahimov olduğunu öyrənə bildik.

Bəs görəsən 7 ildən artıq bir vaxtda niyə bina tikilmir? Yazarların mənzilə ehtiyacı yoxdur, yoxsa binanın tikilməsinə məsul olan şəxs səhlənkarlıq edir? Bəlkə torpağdan başqa niyyətlə istifadə etmək istəyir? Bu haqda AYB üzvləri nə düşünür?

Bu işlər niyə gizli aparılır?

AYB üzvü, şair Maarif Soltan: "Açığı, mən bu məsələləri mətbuatdan eşitmişəm və qəti xəbərim yoxdur ki, həmin yer haradadır, neçə hektardır, binanın neçə bloklu, neçə mərtəbəli, neçə mənzilli olması nəzərdə tutulub. Bina tikmək üçün, kooperativ və qeyri-koopertiv, təbii ki, vəsait lazımdır və bu vəsait də bildiyim qədər nə AYB-də var, nə də AYB üzvlərində. Belə olduğu halda, bu problemi ya dövlətin köməyi ilə həll etmək olar, ya güzəştli kredit götürməklə. Ya da hansısa tikinti təşkilatlarından birinin köməyi və vasitəsi ilə. Mətbuatdan eşitdiyimə görə, hansısa tikinti təşkilatıyla 90/10% nisbətində (10 faiz AYB-yə) artıq müqavilə bağlanıb. Bu praktikadan yaxın keçmişdə bir dəfə istifadə edilib və acı nəticələrini də görmüşük. Belə şərtlə müqavilə bağlamaq, açıq deyim ki, sadəcə, rüsvayçılıqdır – realda yerin qiyməti də məlumdur, hər kv.m-in maya dəyəri və satış qiyməti də. Bu reallıqdan istifadə edərək, kooperativ üzvləri də müəyyən məbləğ ödəməklə, güzəştli şərtlərlə həmin binadan xeyli mənzil ala bilər. Sizin suallarınızı cavablandırmaq məqsədilə mən bir neçə tikinti təşkilatıyla əlaqə saxladım və bu məsələnin şərtlərilə maraqlandım. Ən az təklif edən təşkilat - 30 % təklif etdi, yəni tikilən mənzil sahəsinin 30 %-ni bizə vermək şərtilə. Belə olduğu halda bəs niyə 10%-lə müqavilə bağlanır, yerdə qalan 20% (ən azı) necə oldu? Hər halda bunun üstündə düşünməyə dəyər və belə olduğu halda bu işlər niyə gizli aparılır və məsələn, niyə tender keçirilmir? Daha bir problem, lap elə həmin o 10% hazır olandan sonara hansı prinsiplə bölünəcək? Deyilənə görə, ev növbəsində adam yoxdur və guya növbə prinsipi ləğv olunduğuna görə növbəyə də heç kim götürülmür".

Şair Akif Əhmədgil: "Adam adama alqış edəndə deyir, evin tikilsin... İndi ev tikmək, bina tikmək o qədər də asan məsələ deyil. Əgər Yazicilar Birliyinin rəhbərliyi torpaq sahəsi almağa nail olubsa, bu, özlüyündə təqdirəlayiq bir işdir".

Mənim tanıdığım Anar müəllimin…

Şair Əkbər Qoşalı: "Şah-şair Xətainin adını daşıyan rayonun Şıxlinski küşəsində dövlət tərəfindən yazıçılar üçün torpaq ayrılması necə də rəmzi, rəmzi olduğu qədər də ümidvericidir, deyilmi? Mən belə demək mümkünsə, metafizik baxımından da, fiziki baxımından da o ünvandakı evin məhz yazıçılar üçün ucaldılacağına inanıram. Əgər kim(lər)sə o ünvan üzərində şəxsi çıxarları baxımından "Gecikdirmə, ləngitmə oyunu" oynayırsa, uduzacaq, adıyaman nizamları pozulacaq inşallah. Açığı, mən şəxsən Anar müəllimin evsiz yazıçıların ev almasından yana olduğuna inanıram - mənim tanıdığım Anar müəllimin, əgər oyun varsa da, o oyunu pozacağına da inanıram. Bir az da konkret olsaq, dövlət torpaq ayırıbsa, xeyli yazıçının da evə ehtiyacı varsa, bu iş illa da görülməli - irəli götürülməlidir. Başqa yolu yoxdur".

Bakıda 1 milyon boş mənzil var

Nurəddin Muğanlı: "Bu məmləkətdə yaşayış mənzilə ən çox ehtiyacı olan elə qələm sahibləri - yazıçılardı. Dediyiniz ünvanda nə tikildiyini bilmirəm, amma onu bilirəm ki, Bakıda 1 milyon boş mənzil var, bir o qədər də evə ehtiyacı olan..."

Dövlətimizin yer ayırmaq təşəbbüsü gözəldir

Şair Ayaz Arabaçı: "Evsizlik bütün yazarların yaralı yeridir. Əslində, biz qələmin və Allahın ümidinə dolanan adamlarıq. Belə götürəndə də demək olar ki, mənim nəslimə mənsub olan yazarların, içi mən qarışıq heç birimizin evi yoxdur. Dövlətimizin yer ayırmaq təşəbbüsü gözəldir, Allah bayrağını uca eləsin, amma süründürməçilər və tamahkarlardan da belimiz bağlı deyil. Burda çirkin niyyətlər də olmamış deyil".

Jurnalistlərə ev veriləndə…

Fərqanə Mehdiyeva: "Ev problemi biz yazarların ən yaralı və agrılı yeridir. Torpagın verilməsi müsbət və sevindirici haldir. Amma mənzil tikintisinin yubanması bizi narahat edir. 7 il az müddət deyil. Niyə yubanır, niyə bu qədər ləngiyir? Bəlkə bu məsələyə insafla yanasıla... Bəlkə bu iş həvalə olunan səxsi də narahat edə. Evsiz-esiksiz qalan sair, yazıçıların taleyi ürəkləri titrədə. Jurnalistlərə ev veriləndə biz yazarlar sevindik. Sevindik ki, bizlərə də bir isıq ucu olar. Ümidimiz qırılmasın təki. Təki üzümüzə gələn baharın səməniləri kimi bizim də mənzil almaq ümidlərimiz göyərsin".

İki oğlum subay qocalır

Sabir Yusifoğlu: "Ev-eşiyi kim istəmir ki?! Evimdə iki oğlum subay qocalır. Hər ikisi də yazardı. Səbəb: evsizlik!.. Sadəcə, sözü öldürüblər. Ciddi sözə və söz adamına nəinki ev, heç qiymət verən də yoxdu".

Prezidentə müraciət etsək

Aləmzər Sadıqqızı: Yazıçıların evə ehtiyacı hamıdann çoxdur.

Prezidentimiz bizə torpaq ayırir, həm də ikinci dəfə, amma nədənsə heç kim "xoşbəxt" ola bilmir. Niyə bir dəfə mənzillə bağlı yığışıb diskusiya aparılmır? Məncə, yazarlarımız başda Anar müəllim olmaqla Prezidentə müraciət etsək, o torpaqda ev də tikilər, hələ hərəyə bir kitab rəfi də bağışlanar".

Bu işə vaxt ayıra bilmirəm

Xatırladaq ki, haqqında bəhs olunan torpaqda tikiləcək binanın sənədlərini hazırlamaq və müqavilə bağlamaq Nazim İbrahimova həvalə olunub. Sədr müavini isə əməkdaşımıza, artıq bu işlə məşğul olmayacağını bildirib:

"Mən hansısa MTK ilə müqavilə dağlamaq istəyirdim ki, tikilən mənzilin 10 faizini alaq. Lakin son vaxtlar bunun üstünə çox gedildiyinə və vaxtımın az olmasına görə bu işə vaxt ayıra bilmirəm".

Sədr müavini kooperativ binanın tikilməsinin özünü doğrultmayacağını da deyib, sonda isə, ümumiyyətlə "bu işlə məşğul olmayacağam", - deyib.