Bu gün Türkiyədə bütün nəzərlər AKP-MHP dialoquna yönəlib. Siyasi təhlilçilər Baş nazir Əhməd Davudoğlu ilə MHP lideri Dövlət Baxçalının görüşündə koalisiya hökuməti qurulması razılaşdırılmasa, nələr olacağı sualına cavablar axtarır.

Axar.az-ın xəbərinə görə, "Hüriyyət" qəzetində dərc olunan məqalədə bu konteksdə qoyulan sual təhlil olunub.

Konstitusiyanın verdiyi möhlətə görə, 45 gün ərzində hökumət qurulmalıdır və avqustun 23-də bu müddət başa çatır. MHP-nin isə koalisiya hökuməti qurulması qarşılığında 4 şərt irəli sürməsi danışıqları yenidən mürəkkəb müstəviyə keçirib. Əgər dialoq uğursuz nəticələnsə, erkən seçkilərin keçirilməsi haqda qərarın verilməsi səlahiyyəti parlamentdən alınmalıdır. Bu təşəbbüsü reallaşdırmaq parlamentin növbədənkənar toplantıya çağırılması ilə mümkün ola bilər.

Təcili keçiriləcək toplantıda erkən seçkilər barədə qərar verilməlidir. Türkiyənin erkən seçkilərini AKP təşkil edəcək.

Digər bir çıxış yolu isə parlamentdə təmsil olunan partiyalardan ibarət "seçim hökuməti" formalaşdırmaqdır.

Bu hökumətdə partiyalar nazirliklərdə təmsil olunmaq səlahiyyəti qazanır. Əgər bir partiya razılaşmırsa, Prezident Tayyib Ərdoğan bu boşluğu parlamentdən kənarda olan siyasi partiya ilə kompensasiya edə bilər.