Sentyabrın 27-dən 28-nə keçən gecə dünya nəhəng "qanlı Ay"ı müşahidə edəcək.

Publika.az məlumat verir ki, bu gecə Bakı vaxtı ilə təxminən 06:10 radələrində Yer kürəsinin əksər sakinləri göy üzündə qəribə və nadir hadisənin şahidi olacaq.

Bu, 14 gecəlik Ayın Ay tutulması ilə eyni vaxta təsadüf etməsinin nəticəsidir. Onu da qeyd edək ki, bu hadisə çox nadir hallarda baş verir.

Yer kürəsinin kölgəsi qırmızımtıl çalara malik olduğundan Ayın da əksi Yerlə ahəng təşkil edəcək. Elə "qanlı Ay" ifadəsi də adını burdan götürüb.

Hazırda Ay Yer kürəsinə çox yaxın olan orbitə yaxınlaşır. Bu səbəbdən də göy cisminin ölçüsü adət etdiyimizdən çox-çox nəhəng olacaq. Bu, super Ay adlanır.

Sonuncu dəfə bu cür astronomik hadisə 1982-ci ildə müşahidə edilib. Növbəti dəfə isə 2033-cü ildə olacağı gözlənilir.