Ukraynanın qaz borcunu ödəmək üçün 25 il əvvəl Rusiyaya təhvil verdiyi Tu-160 strateji bombardmançı təyyarələrin uçuşu çox asan idi və 4500 kilometr mənzilli 12 ədəd X-55SM raketi daşıya bilirdi.

Axar.az xəbər verir ki, bu barədə “Azadlıq” radiosuna Tu-160 təyyarəsini idarə edən pilot Vasili Kukulenko deyib.

"Onu iki barmaqla idarə etmək mümkün idi. Bu texnika 4500 km uçuş məsafəsinə malik 12 ədəd X-55SM raketi daşıyıb. Yəni biz Priluki bölgəsindən raket buraxa bilərdik - bütün Avropadan Urala qədər, hər yeri əhatə edirdi. İlk təyyarə 1986-cı ildə Prilukiyə gəlib. Və sonra daha çox təyyarə gəldi", - o bildirib.

Onun sözlərinə görə, bu bombardmançılar Rusiyada ümumiyyətlə xidmətdə olmayıb:

"Rusiyada ümumiyyətlə yox idi. Prilukidə tamhüquqlu Tu-160 alayı olsaydı, bu, 600 raket demək olardı. Onlara cavab olaraq eyni şey atılsaydı, özlərini necə hiss edərdilər? Onlar sadəcə olaraq bu işə başlayıb-başlamamağı düşünərdilər. Birincisi, cavab bizim indiki cavabla eyni olmayacaqdı. Heç kim harasa raket atmaq üçün ABŞ-dan icazə istəməzdi, çünki öz raketlərimiz, təyyarələrimiz olardı".