Avropa Birliyi və Böyük Britaniya Ukraynanın təhlükəsizliyini ABŞ olmadan da təmin edə biləcək.

Axar.az xəbər verir ki, bu sözləri NATO-nun Avropadakı qüvvələrinin keçmiş komandanı, istefada olan admiral Ceyms Stavridis CNN-ə açıqlamasında deyib.

O bildirib ki, Fransa və Britaniya Kiyevə öz döyüş qabiliyyətini və hərbi imkanlarını qoruyub saxlaya bilməsi üçün kifayət qədər dəstək verməyə qadirdir.

Onun sözlərinə görə, söhbət imkanlardan çox, siyasi iradədən gedir. Stavridis qeyd edib ki, AB-nin ümumi ÜDM-i qlobal ÜDM-in 22 faizini təşkil edir:

“AB bu baxımdan ABŞ-dan sonra ikinci yerdədir. ABŞ ÜDM-i qlobal ÜDM-in 25 faizini təşkil edir. Beləliklə, AB-nin imkanları var”.

Onun fikrincə, hadisələrin gedişatına baxanda belə bir siyasi iradənin artıq formalaşdığı görünür:

“Bu, xüsusilə Fransa və Böyük Britaniyada nəzərə çarpır. Birləşmiş Ştatlarla yaranan ziddiyyətlər fonunda, görünür, Avropa Birliyi hərbi güc mərkəzi kimi əhəmiyyətini dərk etməyə başlayır”.

Stavridis həmçinin hesab edir ki, ABŞ Ukraynaya dəstəyindən tamamilə imtina etməyəcək və onu sazişin tərkib hissəsinə çevirəcək.