Günün yorğunluğu, stress, yuxusuzluq və ya yüksək səsə məruz qalmaq – bütün bunlar baş ağrısına səbəb ola bilər. Bəzən isə baş ağrısı müxtəlif xəstəliklərin yan təsiri kimi də ortaya çıxır.

Axar.az baş ağrısından dərmansız xilas olmanın ən effektiv yollarını təqdim edir:

Nanə yağı

Nanə yağı alın və gicgah nahiyəsindəki qan damarlarını genişləndirərək ağrını azaldır. Bir neçə damcı nanə yağını gicgahlarınıza sürtərək, maraj edin və rahatladığınızı hiss edin.

Zəncəfil və limon dəmləməsi

Zəncəfil güclü iltihabəleyhinə xüsusiyyətlərə malikdir. Baş ağrısına, ürəkbulanmasına və miqrenə qarşı faydalıdır. 1 dilim təzə zəncəfil və 1 dilim limonu bir stəkan qaynar suya əlavə edib 10 dəqiqə dəmləyin. Daha sonra süzərək, əldə etdiyiniz dəmləməni içə bilərsiniz.

Lavanda çayı və digər bitki dəmləmələri

Lavanda çayı sakitləşdirici təsirə malikdir və baş ağrısını yüngülləşdirir. Yaşıl çay və çobanyastığı çayı kimi digər bitki dəmləmələri də ağrının azalmasına kömək edir. Ev şəraitində zövqünüzə uyğun bitki dəmləməsi hazırlayaraq istifadə edə bilərsiniz.

Soyuq kompres üsulu

Baş ağrısından azad olmaq üçün soyuq kompres də təsirli üsullardan biridir. Bunun üçün bir parça bezi soyuq suya batıraraq və ya buz torbası istifadə edərək, ağrının hiss olunduğu bölgəyə tətbiq edə bilərsiniz. Bu, damarları daraldaraq ağrını azaldır.