Azərbaycanın Tikantəpə şəhərinin İran parlamentindəki millət vəkili Homayun Haşimi bölgədə yerləşən mədənlərin təhlükəli vəziyyətdə olmasına və mədən işçilərinin maaşının ödənilməməsinə etiraz edib.

Axar.az xəbər verir ki, millət vəkili parlamentin ümumi iclasında çıxışı zamanı Rifah və Əmək nazirinin ünvanında sərt tənqidlər səsləndirib. O, yeni bir mədən faciəsinin yaşanmasının gözlənilən olduğunu bildirib:

“Qərbi Azərbaycanın cənub bölgəsini Gülüstan vilayətinin Yurd mədənində baş verən faciəvi hadisələr gözləyir. Bu istiqamətdə nə üçün heç bir iş görülmür?! Mənim təmsil etdiyim bölgədə təxminən 100 mədən var, onlar Yurd mədənindən daha pis vəziyyətdədir. Bu barədə nazirlərə dəfələrlə xəbərdarlıq etmişəm, lakin heç bir dəyişiklik yoxdur. Bu nazirliklər niyə bu qədər laqeyddirlər?!

Mədənlərdə işləyən fəhlələrin bəzisi 22 aydır əmək haqqı almayıb. Bir ay əvvəl isə 200 mədən fəhləsi işdən çıxarılıb. Bunlar niyə baş verir?”

Qeyd edək ki, Yaxın Şərqin ən böyük qızıl yataqları olan Zrehşoran və Ağdərə mədənləri Qərbi Azərbaycanın Tikantəpə bölgəsində yerləşir. Bölgədə həmçinin 80-dən çox qiymətli daşlarla zəngin mədən mövcuddur. Bütün bunlara baxmayaraq, Tikantəpə bölgəsi Güney Azərbaycanın digər məntəqələri kimi ölkə üzrə ən yoxsul məntəqələrdən biridir. Mədən məhsulları xammal kimi İsfahan, Kirman, Yəzd və Tehran şəhərlərinə aparıldığı üçün bölgə əhalisinə heç bir qazanc gətirmir.