Tanınmış hüquqşünas Səməd Vəkilov 9 fevral 2020-ci ildə keçiriləcək parlament seçkilərinə namizəd kimi qatılmağa qərar verib.

Bu barədə Axar.az-a məlumat verən Səməd Vəkilov 28 saylı Sabunçu üçüncü seçki dairəsindən namizədliyini irəli sürdüyünü qeyd edib. O, bu gün sənədlərini DSK-ya təqdim edib.

Qeyd edək ki, 1975-ci il təvəllüdlü Səməd Vəkilov ali təhsilli hüquqşünasdır. Döyüş bölgəsində, Füzuli-Cəbrayıl istiqamətində (Lələtəpə) həqiqi hərbi xidmət (1998/1999-cu illərdə) keçib.

Hərbi xidmət zamanı hərbi hissənin döyüş fəalları siyahısına daxil edilərək dəfələrlə komandanlıq tərəfindən təşəkkürlərə layiq görülüb.

Qeyri-maddi mədəni irsin hüquqi qorunmasına dair 5-dən artıq elmi və çox sayda publisitik məqalənin müəllifidir.

İnsan hüquqları və məhkəmələrin monitorinqi sahəsində bir çox layihələrin iştirakçısı və rəhbəri olub.

S.Vəkilov Müstəqil Elmi-Praktiki Hüquq Mərkəzində şöbə müdiri, İnsan Hüquqları üzrə Hüquqşünaslar Komitəsində icraçı direktor, AMEA Folklor İnstitunda və Prezident yanında KİV DF-də hüquq müşaviri vəzifəsində çalışıb. 2008-ci ildən Müvəkkil Hüquq Mərkəzinin sədri, Vaqif Səmədoğlu Mərkəzinin təsisçisidir (2019).

Səməd Vəkilov məşhur Vəkilovlar nəslinin nümayəndəsidir.