Bu gün Ermənistan elə bir vəziyyətdə deyil ki, PKK terrorçularını işğal olunmuş Dağlıq Qarabağa yerləşdirib onların xərclərini ödəsin. Həmçinin PKK-da elə bir güc yoxdur ki, Ermənistanın işğalçılıq niyyətləri üçün Azərbaycana qarşı vuruşsun.

Bu sözləri Axar.az-a sabiq xarici İşlər naziri, politoloq Tofiq Zülfüqarov son günlər Ermənistanın PKK terrorçularını işğal olunmuş Dağlıq Qarabağa yerləşdirməsi haqda yayılan xəbərləri şərh edərkən deyib.

Politoloq qeyd edib ki, bu kimi iddiaları Ermənistan təbliğat maşını qəsdən, panika yaratmaq məqsədilə irəli sürür:

“Bu kimi məlumatların yayılmasının səbəbi Azərbaycan ictimaiyyətində panika yaratmaqdır. Mən bu kimi xəbərlərə ciddi yanaşmıram. Bu gün Ermənistanın PKK terrorçularını işğal olunmuş Dağlıq Qarabağa yerləşdirməsi mümkün deyil.

Birincisi, Şimali İraqda bir yox, bir neçə kürd təşkilatı var. Onların bir çoxu Türkiyə ilə mövcud probemləri həll edib. Hətta bir çoxu rəsmi Ankara ilə əməkdaşlıq edir.

İkincisi, Türkiyə ölkə daxilində, Suriyada, İraqda PKK terrorçularına qarşı apardığı antiterror əməliyyatları ilə bu təşkilata çox böyük zərbə endirib. Yəni hazırda PKK elə bir gücdə deyil ki, Ermənistana da hər hansı bir faydası olsun.

Üçüncüsü, nəinki PKK, ağlı başında olan heç bir kəs işğal altında olan Dağlıq Qarabağa köçüb, burada özünü real təhlükə ilə üz-üzə qoymaz.

Bu mənada belə xəbərlərə inanmaq lazım deyil. Ermənistan bu yolla siyasi bir illüziya yaradaraq, başda Azərbaycan ictimaiyyəti olmaqla, hər kəsə özünü “qüdrətli ölkə” kimi göstərməyə çalışır”.