İnzibati Xətalar Məcəlləsinin (İXM) 523-cü maddəsi – “Avaralıqla məşğul olmaq” mövcuddur. “Avaralıqla məşğul olmaq” dedikdə müəyyən yaşayış yeri və ya yaşamağa vəsaiti olmayan, hər hansı ictimai faydalı işlə, yaxud peşə fəaliyyətiylə məşğul olmayan, mütəmadi olaraq xırda oğurluq və ya dilənçilik yoluyla dolanan şəxslər nəzərdə tutulur.

Bunu Axar.az-a açıqlamasında hüquqşünas Əkrəm Həsənov "avaralığa görə" 20 manat cərimə nəzərdə tutulduğu barədə sosial şəbəkələrdə yayılan məlumatı şərh edərkən deyib.

“Avaralıqla məşğul olmağın maksimal məsuliyyəti 20 manatdan 25 manatadək cərimədir. Əgər yetkinlik yaşına çatmayan şəxs bu maddə ilə cəlb edilirsə, 15 gün müddətinə inzibati qaydada həbs də edilə bilər”, - hüquqşünas bildirib.

Qeyd edək ki, mövzunu aparıcı Aytən Səfərova paylaşıb və bu, sosial şəbəkələrdə müzakirələr doğurub.