Özbaşına tikililərlə bağlı məsələ əslində illərdir müzakirə mövzusudur. Bir tərəfdən özbaşına tikililərin sənədləşdirilməsi istiqamətində aparılan müzakirələrdə mühafizə zolaqlarına düşən tikililərin aqibəti ilə bağlı mövqe də özünü göstərir. Xüsusilə son günlərdə bu məsələ bir qədər də aktuallaşıb.

Axar.az xəbər verir ki, bu sözləri Axar TV-yə açıqlamasında əmlak eksperti Ramil Osmanlı deyib.

Onun sözlərinə görə, kollektorların mühafizə zonasında 1600 evin tikilməsi ilə bağlı səslənən fikirlər mövcud reallığı tam əks etdirmir:

“Bu istiqamətdə daha dərin araşdırmalara ehtiyac var. Hər bir halda, özbaşına tikililərlə bağlı sənədləşmə və qərar qəbuletmə prosesində müəyyən fikir ayrılıqlarının olması başadüşüləndir. Hökumətin bu istiqamətdə qərar qəbul etməsində çətinliklərin olması da anlaşılandır, normativ-hüquqi çərçivədə dəyişikliklərə ehtiyac yarana bilər. Lakin mühafizə zolaqlarına düşən fərdi yaşayış evlərinin aqibəti məsələsi ən qısa müddətdə həll olunmalıdır. Bu problem göstərdi ki, sözügedən məsələ hazırda hökumətin qarşısında duran prioritet istiqamətlərdən biridir. Çıxış yolu kimi öz sosial şəbəkə hesablarımda da bir sıra təkliflər irəli sürmüşəm. Onlardan biri də ondan ibarətdir ki, kollektorlar, ötürücü xətlər, magistral su kəmərləri, eləcə də avtomobil yollarının, yüksək gərginlikli elektrik xətlərinin və dəmir yollarının mühafizə zolaqları bu çərçivəyə daxil edilməlidir. Hər bir halda mühafizə zolaqları bu cür qanunsuz tikililərdən təmizlənməlidir. Bu, birmənalıdır və alternativ müzakirə istiqaməti kimi təqdim oluna bilməz. Yalnız bir istisna nəzərə alına bilər. Bəzi ərazilərdə mövcud vəziyyətin iqtisadi və sosial yükü qiymətləndirilə bilər. Əgər hesablamalar göstərərsə ki, məsələn, 3–5 kilometrlik xətt boyunca yerləşən tikililərin köçürülməsi dövlətə 50–100 milyon manat vəsaitə başa gəlir, bu halda alternativ həll yolları nəzərdən keçirilə bilər. Əgər daha ucuz və iqtisadi baxımdan səmərəli variant mövcuddursa, məsələn, kollektorun və ya xəttin yerinin dəyişdirilməsi daha məqsədəuyğundursa, bu seçimə də baxıla bilər. Lakin ümumilikdə mühafizə zolaqları ilə bağlı məsələ öz həllini tapmalıdır”.