"Azərbaycan Xəzər Dəniz Gəmiçiliyi" QSC 40 gəmini istismara yarasız olduğu üçün doğrayacaq".

Bu haqda "Axar.az"a Xəzər Gəmiçiliyidən bildiriblər. Qeyd olunur ki, Xəzər Dəniz Gəmiçiliyi QSC-nin sədri Rauf Vəliyevin göstərişi ilə, aparılan yoxlamaların məntiqi nəticəsi olaraq artıq 40 gəminin yaxın günlərdə doğranıb satılacaq: "Bu gəmilər istismara yarasız olan 3.000 tonluq tankerlər, quru yük daşıyan gəmilər və bir neçə sərnişin gəmisidir".

Doğranacaq gəmilər "2-nci dib" deyilən arakəsmələri olmayan və beynəlxalq konvensiyaların tələblərinə uyğun gəlməyən gəmilərdir. Beynəlxalq konvensiyaların tələblərinə görə, gəmilər ilk 20.000 saat üzdükdən sonra əsaslı təmir olunmalı və yenidən istismara buraxılmalıdır. Ümumilikdə isə 60.000 saatdan çox üzən gəmilər istismar müddətini başa vurmuş hesab olunur. Doğranacaq 3.000 tonluq tankerlər isə artıq 35 ildir ki, alınıb və hazırda yararsız vəziyyətdədir.

Gəmilərin vaxtında doğranaraq metal kimi satılması idarəyə 20.000.000-na yaxın qazanc gətirəcək ki, bu pula da 2 ədəd 13.000 tonluq tanker almaq hədəflənib.

Xatırladaq ki, artıq istifadə müddəti bitmiş bu gəmilərin indiyə qədər doğranmamasının səbəbi kimi təmir adı altında yeyintilər göstərilir. Hazırda buxtada çürüməkdə və təmir adı altında çirkli pulların silinməsində yardımçı olduğu deyilən gəmilərin hamısı balansdan silinəcək və doğranacaq.