ASAN Xidmət ümumvətəndaş pasportunun əldə edilməsi ilə bağlı maraqlı foto-reklam hazırlayıb.

Axar.az xəbər verir ki, ümumvətəndaş pasportunun əldə edilməsində yaş məhdudiyyətinin olmamasını təbliğ edən reklamda indi hər kəs üçün ayrıca xarici pasport almağın mümkünlüyündən danışılır.

Körpələrdən tutmuş ahıl yaşlı şəxslərə qədər hər kəsə fərdi xarici pasportun verilməsində heç bir problem olmadığını göstərən foto-reklamda balaca bir uşaq əlində özünə aid ümumvətəndaş pasportu tutub.

Balaca bununla valideynlərinə artıq onlar tətilə gedərkən nənəsi ilə qalmayacağını bildirir.

Üstəlik nənə də özünə məxsus ümumvətəndaş pasportunu göstərərək “nəvəm hara, mən də ora” deyir.

Xatırladaq ki, əvvəllər körpə uşaqlar valideynləri ilə xarici ölkəyə səfər zamanı onlar haqqında ümumi məlumat ananın ümumvətəndaş pasportuna əlavə edilirdi. Ancaq 2013-cü ildən etibarən 18 yaşınadək vətəndaşlara da digər ölkələrə getmək üçün ayrıca ümumvətəndaş pasportu verilir.