Dövlət Gömrük Komitəsinin Əməliyyat İdarəsinə İrandan Azərbaycana qaçaq mal yolu ilə gətirilmiş narkotik vasitələrin satılacağı barədə əməliyyat məlumatı daxil olub.

Komitədən AzərTAc-a bildiriblər ki, bu məqsədlə yaradılmış əməliyyat qrupu DİN Baş Narkotiklərlə Mübarizə İdarəsinin əməkdaşları ilə Bakı şəhəri, Binəqədi rayonunun Biləcəri qəsəbəsində birgə tədbir həyata keçirib. Əməliyyat zamanı Elməddin Rzayev şərti alıcıya narkotik vasitəni - həşiş qətranını satarkən saxlanılıb. Baxış zamanı ümumi çəkisi 4 kiloqram 600 qram olan narkotik vasitə aşkar olunaraq protokol əsasında götürülüb.

Araşdırılma zamanı E.Rzayev törətdiyi qanunsuz əməlləri etiraf edib, aşkar olunan külli miqdarda narkotik vasitəni İrandan əldə edərək satmaq məqsədilə Azərbaycana qaçaq mal yolu ilə gətirdiyini bildirib.

Faktla bağlı Dövlət Gömrük Komitəsinin İstintaq İdarəsində təhqiqat aparılır.