KQB sədri bizim “Yasin” oxumağımıza mane olmaq istəyirdi, Heydər Əliyev imkan vermədi, dedi, qoy oxusunlar.

Axar.az xəbər verir ki, bu sözləri Bütün Qafqazın şeyxi Allahşükür Paşazadə Ramazan ayının başlaması ilə bağlı bu gün keçirilən tədbirdə deyib.

A.Paşazadə bildirib ki, hadisə rəhmətlik Prezident Heydər Əliyevin xanımı, akademik Zərifə Əliyevanın dəfn mərasimində yaşanıb:

“Zərifə xanım Əliyevanın dəfnində mən və Kamil Əliyev “Yasin” oxuyurduq. Həmin vaxt dəfndə keçmiş SSRİ-nin KQB sədri də iştirak edirdi. O, mərasimdə bizim yüksək səslə “Yasin” oxuduğumuzu görüb tərs-tərs baxırdı. Yaxınlaşıb nə isə demək istəyirdi ki, bizim “Yasin” oxumağımıza maneəçilik törətsin. Rəhmətlik Heydər Əliyev buna imkan vermədi.

Əli ilə ona geri qayıtmağını bildirib dedi ki, işin olmasın, qoy “Yasin” oxusunlar. Halbuki SSRİ KQB sədrinə belə bir söz demək mümkün deyildi. Hamı qorxardı. Onun sözünün qarşısında söz deyilə bilməzdi. Ancaq Heydər Əliyev qorxmazlığını hər məqamda göstərirdi. İnam buna deyərlər. Heydər Əliyevin dinə, islama inamı bu qədər güclü idi”.