"Lerik qətliamını"nı törədən Camaləddin Surətovun məmur atası bölgədə kifayət qədər tanınan ziyalıdır.

Axar.az-ın araşdırmasına görə, qatilin valideyni Cəbrayıl Surətov 1946-cı ildə Lerikin Perzəkücə kəndində anadan olub. 1967-ci ildə indiki Azərbaycan Dövlət Pedaqoji Universitetinin fizika-riyaziyyat fakültəsini bitirib.

Həmin ildə Monidigah kənd tam orta məktəbinə müəllim təyin olunub. 1984-cü ildən Lerik Rayon Təhsil Şöbəsində çalışır. 1999-cu ildə Azərbaycan Respublikası Təhsil Nazirliyinin fəxri fərmanı ilə təltif olunub.

2010-cu ildə Azərbaycan Respublikası Prezidentinin Sərəncamı ilə "Tərəqqi " medalına layiq görülüb. Dəfələrlə Təhsil Nazirliyinin, rayon icra hakimiyyətinin, təhsil şöbəsinin fəxri fərmanlarını alıb. Hazırda Lerik rayon Təhsil Şöbəsinin müdir müavinidir.

Qeyd edək ki, onun oğlu dekabrın 23-də qayınanası Laləni, arvadı Məhsətini odlu silahla qətlə yetirib. Hadisədən sonra uşaqlarını özü ilə götürərək doğulduğu Pirzəküçə kəndinə yollanıb. Daha sonra orada özünü də ölümcül yaralayıb. Xəstəxanaya çatdırılan C.Surətovun həyatını xilas etmək mümkün olmayıb. Qatil Sumqayıda işləyib, iki gün öncə isə ailəsinin yanına rayona qayıdıb.