Azərbaycanda 2013-cü ilin 11 ayı ərzində 2646
yol-nəqliyyat hadisəsi baş verib. Baş verən qəzalar zamanı 1061
nəfər ölüb, 2761 nəfər yaralanıb.
Bunu Daxili İşlər Nazirliyi (DİN) Respublika Baş Dövlət Yol
Polisi İdarəsinin (BDYPİ) İctimaiyyətlə əlaqələr şöbəsinin rəisi,
polis polkovniki Kamran Əliyev bildirib.
Şöbə rəisinin sözlərinə görə, hadisələrin 920-si paytaxt Bakıda
baş verib. Bu zaman 310 nəfər ölüb, 911 nəfər xəsarət alıb.
Kamran Əliyev qeyd edib ki, ötən ilin müvafiq dövrü ilə
müqayisədə ümumən baş verən hadisələrin, eləcə də bu zaman ölən və
yaralananların sayı azalıb. Belə ki, hadisələrin sayı 60, ölənlərin
sayı 4, xəsarət alanların sayı 84 fakt azalıb.
Buna baxmayaraq, piyadaların iştirakı ilə baş verən hadisələrin,
eləcə də ölən və xəsarət alanları sayı artıb ki, bu da çox ciddi
narahatlıq doğurur. Belə ki, piyadaların vurulması ilə nəticələnən
qəzalar hadisələrin ümumi sayının 38,1 faizini təşkil edir. Hesabat
dövründə piyadaların vurulması ilə bağlı 1010 fakt qeydə alınıb. Bu
zaman 364 nəfər ölüb, 728 nəfər yaralanıb. Ötən ilin analoji dövrü
ilə müqayisədə hadisələrin sayı 46, ölənlərin sayı 12,
yaralananların sayı isə 38 fakt çoxdur.
Hadisələrin ümumi sayının 35,5 faizini toqquşmalar (940 hadisə,
399 ölüm, 1298 yaralı), 31,2 fazini ötmə və qarşıdan gələn
nəqliyyat vasitəsinin yoluna çıxma (826 hadisə, 356 ölüm, 1055
yaralı), 28,9 fazini sürət həddinin aşılması (767 hadisə, 380 ölüm,
659 yaralı), 12 faizini aşma (320 hadisə, 157 ölüm, 332 yaralı),
10,2 fazini maneəyə vurma (272 hadisə, 103 ölüm, 302 yaralı) təşkil
edib.
Bundan əlavə, yolayrıcını keçmə qaydalarının pozulması
nəticəsində 230 qəza baş verib, bu zaman 49 nəfər ölüb, 287 nəfər
yaralanıb. Nəqliyyat vasitəsini sərxoş vəziyyətdə idarə etmə
səbəbindən isə 73 hadisə baş verib, nəticədə 29 nəfər ölüb, 88
nəfər yaralanıb. Bu sahədə nisbətən müsbət irəliləyiş hiss olunur.
Belə ötən ilin müvafiq dövrü ilə müqayisədə belə halların sayında
15, ölənlərin sayında 12, yaralananların sayında 9 fakt azalma
müşahidə olunub.
Hesabat dövründə avtobusların iştirakı ilə 97 hadisə qeydə
alınıb, nəticədə 52 nəfər ölüb,116 nəfər xəsarət alıb. Ötən ilin
müvafiq dövrü ilə müqayisədə hadisələrin sayı, 9, ölənlərin sayı 1,
xəsarət alanların sayı 59 fakt azalıb.
Yük avtomobillərin iştirakı ilə 128 yol qəzası baş verib,
nəticədə 57 nəfər ölüb, 113 nəfər xəsarət alıb. Bu da ötən ilin
müvafiq dövrü ilə müqayisədə hadisələrin sayı 12, ölənlərin sayı
16, xəsarət alanların sayı isə 20 fakt azalıb (Trend).