Bu həftənin krimxronikası "bir cənub şəhərində" adlı leytomotivlə xarakterizə oluna bilər.

Axar.az statistikanı təqdim edərək xəbər verir ki, həftənin ən amansız cinayət hadisələri cənub bölgəsində qeydə alınıb.

Əvvəlcə, Lerik rayonunda dəhşətli ailə faciəsi eşidənləri şoka saldı. Rayon sakini, Lerik Təhsil şöbəsinin müdir müavinin oğlu Camaləddin Surətov şəxsi münaqişə zəminində qayınanası Laləni və həyat yoldaşı Məhsətini odlu silahla qətlə yetirdi.

"Goranboy terror"nu xatırladan bu qətlin fərqi qatilin intihar etməsiydi. Məlumata görə, qətl hadisəsini törədən şəxs Sumqayıt şəhərində işləyib, iki gün öncə isə ailəsinin yanına rayona qayıdıb.

***

Lənkəranda isə 2 yaşlı oğlunu boğaraq öldürən ananın həyat tərzi, törətdiyi qətllə bağlı üzə çıxan təfərrüat tükürpədici idi.

24 yaşlı Sevinc Bayramova uşağına etinasız münasibət bəsləyirmiş və bunu kirayədə yaşadığı ev sahibəsi də təsdiqləyib. Sevinc Bayramova uşağını yastıqla boğaraq öldürdüyünü etiraf edib: "Dedi ki, yastıqla boğub, sərbəst yaşamaq istəyir. Daha yalan deyib, doğru deyib - bilmirəm. İki aya yaxındır, burdadır. Mən belə şey görməmişəm".

Məlumata görə, Sevinc Bayramova uşaq evində böyüyərək tərbiyə olunub. Bir neçə il bundan əvvəl rus millətindən olan oğlanla ailə həyatı qurub. Ondan bir övladı dünyaya gəlib. Yarım il öncə həyat yoldaşı dünyasını dəyişdikdən sonra S.Bayramova yaşadığı mənzildən çıxarılıb. Bir müddət müvəqqəti sığınacaqlarda yaşayandan sonra Digah kəndində məskunlaşıb.

Onun oğlu Məhəmməd halsız vəziyyətdə Lənkəran Mərkəzi Rayon Xəstəxanasının pediatriya şöbəsinə çatdırıb. Xəstəyə baxış keçirən həkimlər uşaqda həyat əlamətinin olmadığını aşkarlayaraq bu barədə rayonun hüquq mühafizə orqanlarını məlumatlandırıblar. Ana uşağının qidadan boğularaq öldüyünü desə də, istintaq tədbirləri nəticəsində uşağın boğulub öldürüldüyü müəyyənləşdirilib.

***

Və nəhayət, Lənkəranda 1987-ci il təvəllüdlü Cəbrayıl Ağayev şəxsi münaqişə zəminində həmyerliləri olan iki qardaşı - 1989-cu il təvəllüdlü Camal və 1988-ci il təvəllüdlü Kamal Zakir oğlu Məmmədovları bıçaqlayıb.

Hər iki yaralı yaxınları tərəfindən dərhal Lənkəran Mərkəzi Rayon Xəstəxanasına (MRX) çatdırılıb. Həkimlərin səylərinə baxmayaraq, Camal Məmmədovun həyatını xilas etmək mümkün olmayıb. Hazırda MRX-nin cərrahiyyə şöbəsinə yerləşdirilmiş Kamal Məmmədovun vəziyyəti isə orta-ağır qiymətləndirilir.