Astara rayonunda dəhşətli qətl hadisəsi baş verib.

Axar.az xəbər verir ki, hadisə bu gün səhər saatlarında rayonun Kakalos kəndində qeydə alınıb. Kənd sakini, 36 yaşlı İsmayıl Əkbərov şəxsi münaqişə zəminində həyat yoldaşını öldürüb.

O, əvvəlcə 31 yaşlı Aytən Nurullayevanın başına dəmir boru ilə ağır zərbələr vurub. Daha sonra arvadının ürəyinə çoxsaylı bıçaq zərbələri endirib. Aytən Nurullayeva aldığı xəsarətlərdən hadisə yerindəcə dünyasını dəyişib.

Hadisəni törədən İsmayıl Əkbərov yaxalanaraq istintaq orqanlarına təhvil verilib. O, bu əməlini qısqanclıq zəminində törətdiyini etiraf edib. Qadının meyiti isə müayinə olunmaq üçün Səhiyyə Nazirliyi Məhkəmə Tibbi Ekspertiza və Pataloji Anatomiya Birliyinin Lənkəran Rayonlararası Şöbəsinə aparılıb.

Faktla bağlı Astara rayon Prokurorluğunda araşdırmalara başlanılıb.

Bildirək ki, son həftələrdə cənub bölgəsi baş verən amansız qətllərlə ölkə gündəmindədir. Bir neçə gün öncə Lerik rayonunda Camaləddin Surətovun şəxsi münaqişə zəminində qayınanası Laləni və həyat yoldaşı Məhsətini odlu silahla qətlə yetirməsi, Lənkəranda 2 yaşlı oğlunu boğaraq öldürən ananın həyat tərzi və nəhayət, Lənkəran şəhərində 1987-ci il təvəllüdlü Cəbrayıl Ağayevin şəxsi münaqişə zəminində həmyerliləri olan iki qardaşı - 1989-cu il təvəllüdlü Camal və 1988-ci il təvəllüdlü Kamal Zakir oğlu Məmmədovları bıçaqlaması baş verən silsilə cinayətlər sırasındadır.