Ötən ilin sonu və bu ilin əvvəli iki dəhşətli qətllə yadda qaldı.

Axar.az xəbər verir ki, 2014-cü ilə başkəsmə ilə yekun vuruldu. Belə ki, dekabrın 30-da Zərdabın Hüseynxanlı kəndi ərazisində başı kəsik meyit tapılıb.

ANS-ə hüquq-mühafizə orqanlarında verilən məlumata görə, çöllük sahədə meyiti tapılan şəxsin boğazı kəsilib, bədənin bir neçə yerinə kəsici bıçaq zərbələri endirilib. Meyitin aşağı ətrafı isə yandırılıb və tanınmaz hala düşüb.

Onu Zərdab şəhər məscidinə aparıblar. Araşdırmalar zamanı məlum olub ki, həmin şəxs bir neçə gün əvvəl itkin düşən, rayonun Dəli Quşçu kənd sakini, 1989-cu il təvəllüdlü Rəşad İnşallah oğlu Zeynalovdur. Onun valideynləri gələrək meyitin şəxsiyyətini təsdiqləyiblər.

Qətlin şəxsi münasibətlər zəminində baş verdiyi ehtimal edilir. İlkin versiyalardan biri də hadisənin qısqanclıq zəminində, qıza görə törədilməsidir. Cinayətdə şübhəli bilinən şəxslər də var və onların ətrafında istintaq tədbirləri görülür. İstintaq sirri olduğu üçün şübhəli şəxslərin kimliyi barədə məlumat verilmir.

***

Yeni ilin ilk qətli isə yenə də Goranboydan gəldi. Bayram günü - yanvarın 2-də Goranboy rayon sakini qətlə yetirildi.

Hadisə rayonun Baxçakürd kəndində baş verib. Kənd sakini, 1982-ci il təvəllüdlü Quliyev Zaur Muxtar oğlu qohumu, rayonun Dəyirmançı kənd sakini, 1977-ci il təvəllüdlü Avazov İsrafil Avaz oğlunu bıçaqlayıb.

Dərhal Gəncə Şəhər Təcili Tibbi Yardım Xəstəxanasına çatdırılan yaralının həyatını xilas etmək mümkün olmayıb. Faktla bağlı Goranboy Rayon Prokurorluğunda cinayət işi açılıb, istintaq gedir.

***

Yanvarın 2-də növbəti qətl qız üstündə Kürdəmirdə olub. Pirili kəndində yanvarın 2-nə keçən gecə 1985-ci il təvəllüdlü Elnur Zeynalov ağır bıçaq xəsarətləri ilə Rayon Mərkəzi Xəstəxanasına gətirilib. Həkimlərin səyinə baxmayaraq, E.Zeynalovun həyatını xilas etmək mümkün olmayıb. Qətl hadisəsini törədən 1995-ci il təvəllüdlü Ruhani Məlikov polis tərəfindən saxlanılıb.

Məlumata görə, qızın qohumu R.Məlikovla E.Zeynalov arasında mübahisə düşüb.