1300 namizədin 13-ü, 13-ü olmasın, 23-ü, 23-ü olmasın, 53-ü gəlib MSK-nın binası qarşısında aksiya keçirdi. Qalib gəlməyən namizəd narazı olar, onun razı olması təəccüb doğurar.

Axar.az xəbər verir ki, bunu MSK sədri Məzahir Pənahov bu gün keçirilən iclasda bildirib.

O, daha sonra deyib:

“Biz də deyirik ki, gəl, narazlığını bildir. Mən aksiya günü köməkçilərimi, MSK katibliyinin müdirini, MSK katibini ora göndərdim. Onlar dövlət orqanının qanunla, zamanla tənzimlənən işini görməyə mane olurlar. Mən özüm şəxsən onlara 6 saat şərait yaratdım. Hamıdan xahiş edirəm, hətta yalvarıram ki, Rəbiyyə Məmmədovanın, Mehman Hüseynovun etibar etdikləri vəkillər onların görüntüləri əsasında şikayət hazırlasınlar, o görüntülər əsasında biz həmin məntəqələr üzrə nəticələri ləğv edək”.

M.Pənahov qeyd edib ki, fevralın 11-də baş tutan aksiya ümumi fon yaratmağa xidmət edirdi:

“Özü də mənfi fon yaradır. Əgər müsbət olsa, bu, bizim işimizə xidmət edər. Onların dediklərini yerinə yetirsək, cəmi iki-üç faiz dairdə nəticələrdə dəyişiklik olar. Həmin aksiya öz-özlüyündə Azərbaycanda ictimai-siyasi vəziyyətin normal olmasının göstəricisi idi. Mən özüm həmin kadrlara – binamızı xarici telekanallarda göstərmələrinə baxıb ləzzət alırdım. Axşamüstü gəlmişdilər, bir az da tez gəlsəydilər, binamız daha gözəl görünərdi”.