Rabitə və Yüksək Texnologiyalar Nazirliyinin "Poçt göndərişlərinin izlənilməsi" xidməti "Elektron hökumət" portalı üzərindən göstəriləcək.

Nazirliyin mətbuat xidmətindən Axar.az-a verilən məlumata görə, nazirliyin "Poçt göndərişlərinin izlənilməsi" xidməti portala inteqrasiya olunub.

Bu xidmət vasitəsilə nazirliyin "Azərpoçt" MMC-nin şəbəkəsində qeydiyyatlı poçt göndərişlərinin qəbul, çeşidləmə, daşınma və çatdırılma kimi keçid mərhələlərinin internet vasitəsilə izlənilməsi həyata keçirilir.

Xidmətin göstərilməsi üçün poçt göndərişinin unikal poçt identifikatorunu - 13 simvoldan ibarət ştrixkod nömrəsini müvafiq sahəyə daxil etmək tələb edilir. Ştrix-kod nömrəsi poçt şöbəsi tərəfindən poçt göndərişinin qəbuluna dair müştəriyə verilən qəbzdə göstərilir.

Sorğu qəbul edildikdən sonra axtarılan poçt göndərişinin qəbul məntəqəsindən çatdırılma məntəqəsinədək keçdiyi bütün mərhələləri özündə əks etdirən məlumatlar cədvəl şəklində ekranda göstərilir.