"Azəriqaz" İstehsalat Birliyi işçilərinin geyimində dəyişiklik edilməsi barədə qərar qəbul edib.

Axar.az xəbər verir ki, SOCAR-a daxil olan bütün birliklərdə işçilər üçün xüsusi geyim növü müəyyən edilib.

SOCAR-ın özündə olduğu kimi "Azəriqaz" İB-də də işgüzar geyim formasının tətbiq edilməsinə başlanılıb. Birliyin əməkdaşlarının xarici görünüşündə işgüzar imicin formalaşdırılması məqsədilə avqustun 3-dən "Azəriqaz"da bu cür geyim forması tətbiq edilir.

Məlumatı "Azəriqaz" İB-in mətbuat xidmətinin əməkdaşı İbrahim Kərbalayev Modern.az saytına təsdiqləyib.

Tətbiq edilən qərara əsasən, işçi tələb olunan geyimi özü almalıdır. Qaydalara görə işçinin köynəyi solğun və tək tonlu olmalıdır; nazik zolaqlı da ola bilər, üstü yazılı, şəkilli, parlaq rəngli köynəklərin geyilməsi qadağandır; eyni zamanda, köynəyin sonacan düymələnməsi vacibdir.

Qalstuk parlaq rəngli, üstü yazılı və şəkilli olmamalıdır, pencək və köynəyə uyğunlaşdırılmalıdır. Şalvarlar mümkün qədər tünd rəngdə olmalı, parlaq və zolaqlı olmamalıdır.

Ayaqqabı formal və tünd rənglərdə olmalıdır. İdman üslublu ayaqqabılar qadağandır. Corablar da unudulmayıb. Bu geyim şalvara uyğun seçilməlidir, qara, tünd göy, boz, qəhvəyi rənglərdə və uzun olmalıdır. Qısa corablar geyilə bilməz.

Aksesuarlara gəlincə, bildirilir ki, sadə qol düymələri, qalstuk sancağı, saat və nişan üzüyü istifadə oluna bilər. Boyunbağı, qolbaq, qabarıq rəngli üzük və saatlar istifadə edilə bilməz. Saçlara gəlincə qurum öz işçilərinə bildirir ki, saçlar səliqəli formada daranmalı, uzun saçlar isə yığılmalıdır. Ən əsası üz təraş olunmalıdır.