Bakı-Quba avtomobil yolunda aparılan təmir işləri yekunlaşıb.

Azəryolservis ASC-dən Axar.az-a verilən məlumata görə, Şabranın Gəndob kəndi ərazisindən Bakı istiqamətinə doğru yolun 11 kilometrlik hissəsində aparılan təmir-bərpa işləri artıq bitib.

Artıq yolun bu hissəsi tam yeni görkəmdə sürücülərin ixtiyarına verilib.

Sözügedən ərazidə normadan artıq yüklənmiş ağır tonnajlı yük maşınlarının hərəkəti nəticəsində deformasiyaya uğramış yolun hərəkət hissəsinin bərpası işləri də görülüb.

Hazırda yolun hərəkət hissəsinin eni 1,5 metr genişlənib. Yol kənarında təqribən 3 metr enində çiyin yaradılıb. Bundan başqa, yolun ayırıcı zolağında olan əyrixətli dəmir tirlər beton arakəsmə ilə əvəzlənir.

Beton plitələr üzərində təkərqaytaranların mövcudluğu sürücü və sərnişinlərin təhlükəsizliyi baxımından çox önəmlidir.

Artıq təmir olunmuş yolun bir hissəsinə bu cür beton arakəsmələr qoyulub və bu işlər davam etdirilir.