ANS-ə qarşı çıxarılan qərarda iki yanaşma var. Birincisi, Milli Televiziya və Radio Şurasının (MTRŞ) televiziyaların fəaliyyətinə yaxından nəzarət etməsi. Bu, çox müsbət haldır. Amma ikinci və pis olan cəhət bundan ibarətdir ki, MTRŞ özünü televiziya polisi kimi aparır.

Bu fikirləri Axar.az-a media eksperti Qulu Məhərrəmli son günlər MTRŞ-in tele-verilişlərlə bağlı sərt addımlarını şərh edərkən deyib. O, bu cür addımların cəmiyyətdə nəzəri fikirlər formalaşdırdığını bildirib:

"Teleməkanda həddindən artıq qüsurlar var. Müəyyən təlimatlara, qanunlara əməl olunmur. Məsələn, xəbərlərdə fikir sərbəstliyi, dolğunluq yoxdur. Bəzi qanun pozuntuları var və s. Amma MTRŞ-in ard-arda ANS-ə bu şəkildə kəskin hücumu istər-istəməz müəyyən subyektiv fikirlərin yaranmasına səbəb olur. Hesab edirəm ki, "Salam Azərbaycan" verilişinin yayımının 10 gün dayandırılması qətiyyən yolverilməzdir. Gündəlik efirə çıxan proqramın dayandırılması maksimum 1 günlük ola bilər.

MTRŞ-in verdiyi bu qərarlar cəmiyyətdə nəzəri fikirlərə, müəyyən düşüncələrə yol açır. Belə çıxır ki, MTRŞ bu səlahiyyətləri köhnədən haq-hesabı olan televiziya kanalına öz gücünü göstərmək üçün əldə edib. Bunu bir qədər ədalətsiz yanaşma hesab edirəm. Televiziyaların yayım istiqamətinə MTRŞ-in bu şəkildə müdaxilə etməsi yanlışdır".

Xatırladaq ki, Milli Televiziya və Radio Şurasının qərarı ilə ANS Müstəqil Yayım və Media Şirkətinə ANS televiziyasının efirində reklam şərtlərini pozduğuna görə bəzi verilişlərin yayımının dayandırılması göstərişi verilib. Bununla yanaşı, telekanal ümumilikdə 54 min manat cərimələnib.