Milli Televiziya və Radio Şurasının ANS telekanalına qarşı tərtib etdiyi sanksiya ictimaiyyətdə birmənalı qarşılanmayıb. Tanınmış jurnalist, televiziya eksperti Qulu Məhərrəmli də bu qərarın kanala qarşı qərəz təəssüratı yaratdığını bildirib.

Axar.az bununla bağlı qarşı tərəfin mövqeyini öyrənib. Beləliklə, sualları Milli Televiziya və Radio Şurasının Aparat rəhbəri Toğrul Məmmədli cavablandırır.

- Toğrul müəllim, Şuranın qərarı ilə ANS Müstəqil Yayım və Media Şirkətinə 54 min manat cərimə tərtib edildi. Ümumilikdə götürsək, bənzər qüsurlar digər telekanallarda da mövcuddur. Sizcə, yalnız ANS-in seçilməsi ədalətsiz qərar deyil ki?

- ANS Müstəqil Yayım və Media Şirkətinə qarşı heç bir qərəz yoxdur və ola da bilməz. Bu cür verilişlərlər bağlı telekanalların siyasətinə MTRŞ-nin qarışmaq səlahiyyəti mövcud deyildir. Lakin "Televiziya və radio yayımı haqqında" Qanuna dəyişikliklər edildikdən sonra Şura qanunun tələbləri pozulduğu halda proqramların yayımının dayandırılması səlahiyyətinə sahib oldu.

"Televiziya və radio yayımı haqqında" Qanuna edilən dəyişikliklərə əsasən, teleradio yayımçılarına xüsusi lisenziyanın qüvvəsinin müvəqqəti dayandırılması və lisenziyanın qüvvəsinə xitam verilməsi sahəsində səlahiyyətlər məhkəmələrdən alınaraq Milli Televiziya və Radio Şurasına (MTRŞ) verildi. Buna görə də qanunla tələblərin pozulduğu halda tədbirlər görülə bilər. MTRŞ tərəfindən də bayağı verilişlər verən telekanallara ciddi xəbərdarlıqlar olundu və kanal rəhbərləri bu mövzuda müəyyən işlər gördülər. Məsələn, "Öz aramızda" verilişi şəxsən ATV rəhbərliyinin qərarı ilə dayandırıldı. Lakin ANS Şuranın xəbərdarlıq və tövsiyyələrini yerinə yetirmədi. Buna görə də sanksiya tətbiq olundu. Digər telekanallarda da həmin verilişlər gündəmdədir. Əgər o verilişlərlə bağlı müəyyən bir dönüş olmayacaqsa, Şura o kanallara da sanksiya tətbiq edəcək.

- ANS hüquqlarının pozulduğunu əsas gətirərək, məhkəməyə müraciət etməklə bağlı qərarını elan edib. Məhkəmə olarsa, MTRŞ mövqeyini müdafiə edə biləcəkmi?

- Məhkəməyə müraciət etmək hər bir şəxsin hüququdur. Əlbəttə, MTRŞ konkret faktlara, qanun pozuntularına əsaslanaraq bu qərarı verib və qərarını da əsaslandırıb.

- MTRŞ-nin bu səlahiyyətindən köhnədən haq-hesabı olan televiziya kanalına öz gücünü göstərmək üçün istifadə etməsi barədə rəylər də səslənir. MTRŞ ilə ANS-in hansı köhnə ədavəti var?

- MTRŞ-nın heç bir telekanalla, heç bir problemi yoxdur. Və heç bir telekanala qarşı da ayrı-seçkilik etmir. Hər bir telekanala qarşı indiyədək humanizm prinsipi əsas götürülüb. Hətta əksər vaxtlarda cərimə sanksiyalarının əvəzinə xəbərdarlıq edilib .

Artıq güzəşt olmamalı, telekanallarımızda milli-mənəvi dəyərlərə zidd, bayağı olan verilişlər yığışdırılmalıdır. "Televiziya və radio haqqında" Qanunun tələblərinə ciddi şəkildə əməl olunmalıdır. Bununla bağlı MTRŞ ictimai rəyi nəzərə alır. Sanksiyalar tətbiq edildikdən sonra Şuranın qaynar xəttinə xeyli sayda təşəkkür müraciətinin daxil olması da təsdiqləyir ki, Şura ciddi qərarlarından nə qədər haqlıdır.

- MTRŞ xüsusilə son zamanlar bayağı, milli-mənəvi dəyərlərə zidd olan verilişlərin adını çəkir, ancaq nədənsə baxımlı, təqdir etdiyiniz verilişlər barədə danışmırsınız. İctimai fikri də əsas götürərək, lazımlı saydığınız verilişlərin siyahısını hazırlamaqla onlara dəstək olmaq yaxşı olmazdımı?

- Əlbəttə, bununla bağlı gələcəkdə geniş məlumat verməyi nəzərdə tuturuq. Amma hələ ki, əsas məqsədimiz ictimaiyyəti narahat edən verilişlərin yayımını dayandırmaqdır. Əhalinin tələbatını ödəyən verilişlərlə bağlı zaman-zaman addığımız addımların da şahidi olacaqsınız.

- "Əhalinin tələbatını ödəyən veriliş" dedikdə nəyi nəzərdə tutursunuz? Bu cür verilişlərin formatını telekanallara təqdim etməyi düşünürsünüzmü?

- Bəli, gələcəkdə Şura tərəfindən bununla bağlı mexanizm işlənilməsi nəzərdə tutulub. Azərbaycan teleməkanında ciddi islahatların ehtiyac duyulur və bu məqsədlə Şura üzərinə düşəni etməyə çalışır.

Xatırladaq ki, Milli Televiziya və Radio Şurasının qərarı ilə ANS Müstəqil Yayım və Media Şirkətinə ANS televiziyasının efirində reklam şərtlərini pozduğuna görə bəzi verilişlərin yayımının dayandırılması göstərişi verilib. Bununla yanaşı, telekanal ümumilikdə 54 min manat cərimələnib.