Yaponiyanın Osaka Universitetinin tədqiqatçıları Banqladeşdə toyuq ətinin tərkibində “Escherichia albertii” bakteriyasının yüksək konsentrasiyasını aşkarlayıb. Sözügedən bakteriya az tanınmağına baxmayaraq, bağırsaq çöpünün potensial təhlükəli yaxın “qohumudur”.

Axar.az Trend-ə istinadən xəbər verir ki, araşdırma ilə bağlı məqalə “International Journal of Food Microbiology” dərgisində çap olunub.

Aşkarlanan patogen mədə-bağırsaq xəstəliklərinə yol açır və antibiotiklərə yüksək dayanıqlılıq nümayiş etdirir ki, bu da onların müalicəsini xeyli zəiflətmiş olur.

“E. Albertii” ilk dəfə Banqladeşdə 2003-cü ildə üzə çıxıb. Həmin vaxtdan bəri sözügedən bakteriya Cənub-Şərqi Asiyada, o cümlədən Yaponiyada kütləvi qida zəhərlənmələrinə səbəb olub.

Bununla belə, bu bakteriya hələ də yetərincə öyrənilməyib və tez-tez digər mikroorqanizmlərlə səhv salınaraq yanlış təsnif edilir.

Qeyd edək ki, araşdırma üçün tədqiqatçılar Banqladeşin dörd bölgəsində yerləşən 17 ticarət obyektində toyuq ətindən, daxili orqanlardan, kloakadan götürülmüş yaxmalardan, işçi heyətin əlindən və toyuq emalı avadanlıqlarından nümunələr toplayaraq analiz aparıblar.