“Georgi lenti” 1769-cu ildə imperatriça II Yekaterina tərəfindən təsis olunub və Rusiya üçün savaşan rus əsgərlərinə verilən mükafatlar onun üzərinə vurularaq təqdim olunurdu.

Axar.az xəbər verir ki, bu barədə siyasətçi Natiq Cəfərli xatırlatma edib.

O bildirib ki, bu “lent”in təsis olunmasına səbəb isə Rusiya-Türkiyə (Osmanlı) müharibəsi idi:

“İlk o müharibədə vuruşan ruslara təqdim edilib. Yəni bu parçanı taxanlar faktiki olaraq Türkiyəyə qarşı vuruşanların xatirəsini də yad etmiş olurlar”.

Siyasətçi İmişlidə baş verən hadisəni bu baxımdan “bisavadlıq və köksüzlük” adlandırıb.

Qeyd edək ki, İmişli Rayon Ağsaqqallar Şurasının sədri Saleh Səmədov mayın 9-da İmişlinin Sarıxanlı kəndində faşizm üzərində Qələbə Günü münasibətilə təşkil olunan tədbirdə SSRİ bayrağı altında, sinəsində rus imperiyasının rəmzi olan “Georgi lenti” ilə çıxış edib və bunu adi hal adlandırıb. O, buna görə vəzifəsindən azad edilib. O tədbirdə iştirak edən İmişli Ağsaqqallar Şurasının üzvləri də (o cümlədən Saleh Səmədovun yerinə müvəqqəti təyin edilən Vahid Tağıyev) yaxalarına “Georgi lenti” taxıblar.