Şirvan şəhər sakini keçmiş sevgilisinə görə iki nəfəri bıçaqlayıb.

Axar.az Oxu.az-a istinadla xəbər verir ki, hadisə şəhərin Heydər Əliyev prospekti, 58 ünvanında baş verib. Şəhər sakini Elxan Heydərov (soyadı şərtidir) mübahisə zəminində tanışı Qüdrət Abdullayev və onun qardaşı oğlu İmran Abdullayevi bıçaqlayıb.

Hadisə Elxanın keçmiş sevgilisinə görə olub. Belə ki, Elxan əvvəllər münasibətdə olduğu Lalənin yaşadığı binanın qarşısından keçərkən qadının bir maşına minərək getdiyini görüb. O, həmin avtomobili Qüdrətin maşınına bənzədib və zənn edib ki, Lalə Qüdrətlə münasibətdədir. Elxan dərhal Qüdrətə zəng vuraraq harada olduğunu soruşub. Qüdrət isə bildirib ki, Kürdəmir rayonundadır. O, Qüdrətin yalan danışdığını düşünərək ona Şirvan şəhərinə qayıdanda zəng etməsini tapşırıb. Lakin Qüdrət Elxana zəng vurmayıb. Həmin gün axşam Elxan Qüdrətə zəng vuraraq yerini soruşub. Qüdrət isə Şirvan şəhəri ərazisində, qardaşı oğlu İmranın yaşadığı ünvanın yaxınlığındakı evlərdən birində işlədiyini bildirib.

Elxan dostu ilə həmin ünvana gələrkən küçədə İmranla rastlaşıb və ondan Qüdrəti soruşub. Elə bu vaxt Qüdrət qonşunun evindən çıxıb onlara tərəf gəlib. Elxan Qüdrəti kənara çəkib ona Laləni hara apardığını soruşub. Qüdrət isə məsələdən xəbərsiz olduğunu bildirib və ona "sən öl, həmin şəxs mən olmamışam" deyib. Qüdrətin yalan danışdığını düşünən Elxan onu yumruqla vurub və Qüdrət yerə yıxılıb. Bu vaxt İmranın onlara tərəf gəldiyini görən Elxan cibindəki bıçaqla hər ikisinə zərbələr endirib.

Hər iki yaralı xəstəxanaya çatdırılıb.

Keçirilən əməliyyat-axtarış tədbirləri nəticəsində hadisəni törətməkdə şübhəli bilinən Elxan saxlanılıb və barəsində cinayət işi başlanıb.

Məhkəmənin hökmü ilə Elxan Heydərov iki il dörd ay azadlıqdan məhrum edilib.