İŞİD – heç də yaxşı ad deyil. Dilim dönmür. "İraq-Şam İslam Dövləti" demək də çox vaxt aparır. Bu qondarma və qondurma dövlətin adını tələffüz edib qurtarana qədər bir gilə yarım siqaret çəkmək olar. Doğrusu, İŞİD deyəndə adamın az qala qarnı "işdəyə". Mübaliğəsiz deyirəm, İŞİD sözündən idrar iyi gəlir. Bu qondarma adı eşidəndə adamı don vurma tutur və qan durması baş verir.

İŞİD-çilər çəyirtkə taxıla səpələnən kimi səpələniblər İraqın, Suriyanın toz-torpaq küçələrinə. Kasıbları kiçik torpaq evlərindən çıxarıb qətlə yetirir, böyük bir qəhrəmanlıq edirmiş kimi əcaib- qəraib səslər çıxarır və ən dəhşətlisi Allahın adını ağızlarına alırlar.

Yadıma gəlir, əvvəllər müsəlman ailələrdə körpə uşaqların tərbiyəsi ilə məşğul olduqda, onları pis əməllərdən çəkindirəndə, gecə yatmaq istəməyəndə xoxanla, cin-şəyatinlə qorxuzardılar. İndi, İŞİD-i işə salmaq olar: "Ay uşaq gəl, yıxıl yerində yat, indi İŞİD gələr ha... İŞİD-ə deyərəm ha... Boy, İŞİD gəlmə, gəlmə, balam yatır, balam ağıllıdır..." - və sair.

İŞİD-çilər çirkli saqqalları, yalın ayaqları ilə elə bil, əsrlər öncənin canlılarıdır. Mağaralardan, kahalardan çıxıblar. İnkişaf etmələri müşahidə olunmur. Bədəvi və bəd əməldirlər. Baş kəsib, qan tökürlər. Bu qədər qəddarlıq heç görünməyib. Allahın, onun peyğəmbərinin adını çəkib səhrada dəvə başı kəsirlər kimi Məhəmməd hümmətinin - müsəlmanın, öz din qardaşlarının başını kəsirlər. Yer də, göy də, yerdəkilər də, gözəgörünməz Kişi də hələ ki bu zülmü götürür. Amma götürüb onların qəlbinə insaf toxumu səpmir...

Kəsilmiş başlarla futbol oynamaq həvəsləri, sanki hadisələrin futbol üzrə dünya çempionatı günlərində baş verməsindən yarandı. Görəsən voleybol üzrə dünya çempionatı keçirilsə idi İŞİD-çilər kəsilmiş başla voleybol oynayacaqdımı?

Vəhşiliklərinin video-görüntülərini yayınlayırlar. Dünya müsəlmanın necə qəddar olmasını görür. İslami dəyərlərə qiymət verilmir. Ən ali dinin nümayəndələri ən nadürüst hərəkətlər sərgiləyir. Allahın böyüklüyünə tapınanlar Allahın yaratdığı ən ali varlığı yox edir, namusuna təcavüz edir.

Paradoksaldır. Baş kəsən də Allahın böyüklüyün dilinə gətirir, başı kəsilən də. Hər iki tərəf də "Allahü–əkbər" deyir. Böyük olan Allah da eləcə yuxarıdan aşağı baxır. Baxır və... heç nə, eləcə baxır. İndi ağzı ehsan qoxusu verənlər deyəcək ki, Allahın qəzəbinə gəliblər, Allah onlara qiyaməti bu dünyada göstərir. Onlar buna layiqdir.

Bu, torpaq savaşı, millət savaşı, yad elliyə, qəsbkara qarşı yönələn qəzəb deyil. Bu, məzhəb, təriqət davasıdır. Uduzan da özləridir. Torpaqları istila olunur, sərvətləri yağmalanır, uzağı görmürlər. Elə həmin torpaqda dərisi soyulan Nəsimi demiş, gözlərini tor tutub bunların. Dədə Qorqud demiş, öz qılıncları öz başına endirilir. Baş kəsən başını kəsdiyini allahsızlıqda, kafir olmaqda suçlu bilir. Elə başları kəsilənlər də baş kəsənləri eyni cür ittiham edir. Hər tərəf Allahın böyüklüyünə, saflığına, müdrik olmasına güvənir. İŞİD-çilər tərəfindən başı kəsilən 10 yaşlı İraq türkməni, şiə məzhəbli uşaq son nəfəsində deyir: "Allaha deyəcəm bunların vəhşiliyini". O, uşaq günahsız olduğunu bilir, o uşaq o əminliklə başını kötüyün üstünə qoyur ki, Allah onu yanına çağıracaq və o uşaq inanırdı ki, Allahın bütün bunlardan xəbəri yoxdur. Allah bunları görmür. O, hələ ki sağ qalanları əmin edirdi: "Allaha deyəcəm, şikayət edəcəm..."

İllər öncə İŞİD-ə dəstək olan Qərb, Avropa mətbuatı müqəddəs kitabımız Quranı murdarladı, peyğəmbərə təhqir yağdırdı, dinimizi aşağıladı. Bütün ərəb-müsəlman dövlətlərində küçələrə çıxdılar. Səfirlikləri daşa basdılar, binaları yandırdılar, özləri öz şəhərlərini viran qoydular. Bununla da özlərini aldatdılar, özlərini İslamın müdafiəçisi kimi qələm verdilər. Başa düşmədilər ki, yandırdıqları maşınlar, qarət etdikləri ticarət mərkəzləri, qapı-pəncərəsini daşa basdıqları binalar əslində elə özlərinindir. Keçmişlərini, bu günlərini, gələcəklərini daşa basırdılar kaha təfəkkürlülər. Qərbin, sionizmin barmaqlarının işarəsi ilə qızışdırılıb ortaya atılıb da özlərini məhv etməklə məşğul oldurlar.

Neçə illərdir Qərb politoloqları, sosioloqları bar-bar bağırıb müsəlmanların sayca artımının təhlükə olacağını deyir. Bunu təhlükə kimi görürlər. Vətəndaş müharibələrinə rəvac verdilər. Müsəlman müsəlmanın qanına susadı, baş kəsdi, qan tökdü və bununla da dini gözdən saldılar...

Allahu-akbar!!!