İnsan niyə bu qədər müharibəni sevməlidir? Bəli, Rusiyanın Suriyada gündə 60-70 döyüş uçuşları keçirdiyini az qala fəxrlə deyən təhlilçilərin tövründən belə hiss olunur ki, bu adamlar müharibəni təkcə sevmirlər, ondan hətta estetik zövq alırlar.

Müharibəni sevmək olarmı? Mənə elə gəlir ki, dünyadakı bütün müharibələrdən yalnız biri var ki, ona bəraət qazandırmaq, onu qəbul və təqdir etmək mümkündür. Bu da vətən müharibəsidir. İnsan vətənini qorumağı bacarmalıdır, bircə şərtlə ki, o, gərək digər insanların da vətən haqqını tanımış olsun...

Bəli, bu gün Rusiya Suriyada döyüşür. Üstəlik, o, bəlkə yeganə dövlətdir ki, bir an belə dayanmır, ağla gələn, gəlməyən geosiyasi ssenarilər cızır... Bu ssenarilərdən biri də Yaxın Şərqdə kürd dövlətinin yarana bilməsidir. İndi Suriya kürdləri Rusiyaya böyük ümidlə baxır və güman edirlər ki, ruslar onların elan etdikləri muxtariyyəti tanıyacaq...

Bizə həmişə elə gəlib ki, Rusiyanı kürd hərəkatları ilə böyük tarixi əlaqələr və iş birliyi bağlayır. Mən PKK-nın tarixini bütün təfsilatı ilə bilmirəm, amma bu təşkilatın bir vaxt solçu-marksist olmasının fərqindəyəm. Üstəlik, İraq kürdlərinin liderləri də vaxtilə Moskvada təhsil almış insanlar idi...

Sözsüz ki, mən bununla nəyəsə kölgə salmaq niyyətindən uzağam. Bir azacıq əvvəldə yazmışdım ki, hamının vətən haqqı var. Amma bu, o demək deyil ki, sən harada üç nəfər oldunsa, gərək mütləq böyük iddilara düşəsən. Təəssüf ki, bəzən belə də olur...

Ən qəribəsi isə bilirsinizmi nədir? Bu qovğada hətta ABŞ-la Rusiya arasında belə anlaşma tapmaq mümkündür. Mənə elə gəlir ki, bu müharibədə mütəfiqi olmayan bir dövlət varsa, o da Türkiyədir. Rusiya öz mediasında kürd problemini aktuallaşdırmaqla məşğuldur, ABŞ hələ S.Hüseyn vaxtından kürd icmasına böyük vədlər verir...

Olsun. Türkiyədən kənarda kürd dövlətinin yaranmasının bizim üçün nə istisi, nə də soyuğu var. Qoy, yaransın. Amma Türkiyədə bundan çox ehtiyat edirlər və düşünürlər ki, harada yaranmasından asılı olmayaraq kürd dövləti Türkiyədəki kürd separatizmini stimullaşdıracaq və yaranacaq yeni dövlət heç şübhəsiz ki, Türkiyəni təhdid edəcək.

Qardaşımız Türkiyənin narahatlığını anlayırıq. Elə bizim nigarançılığımız da məhz Türkiyə ilə bağlıdır. Amma biz Türkiyədə kürd probleminin indiki siyasi məntiqlə həllini görmrük. Bizə elə gəlir ki, Türkiyə kürd problemini öz ərazisindən başqa ölkənin ərazisinə transfer etməyi, köçürməyi bacarmalıdır...

Birada mənim yadıma 92-93-cu ildən bir epizod düşür. Bir türkiyəli dostum israrla məni inandırmağa çlışırdı ki, Türkiyədə kürd yoxdur, orada dağ türkləri var. Mənim indi də onunla mübahisə etmək fikrim yoxdur. Olsun. Qoy, lap elə dağ türkləri olsun. O vaxt da demişdim ki, siz onların mövcudluğunu inkar edə, onlara kürd deyil, dağ türkləri deyə bilərsiniz, amma bu, problemi həll etmir - bu insanlar özlərini fərqli bir millət hesab edir, lap açığı, onlar özlərini qətiyyən türk hesab etmirlər...

Həm də kürdlər dünyada o qədər çoxdurlar ki, onları inkar etmək ən yaxşı bir halda gülüş doğura bilər – onlar var və bir neçə dövlətin ərazisində nəsə etməyə cəhd edirlər...

Bizim üçün əsas olan nədir? Türkiyə bu problemdən qurtulsun! Türkiyədən xəbərlərə baxmaq olmur, az qala hər gün terror, hər gün ölüm... Nə vaxta qədər belə davam edəcək? Ən çox düşündürən məqamlardan biri də budur ki, kürdlərin demoqrafik problemi yoxdur, onlar sürətlə artırlar... Deyə bilmərəm indi onlar Türkiyədə nə qədərdir, amma onu bilirəm ki, heç az da deyillər...

Ona görə də düşünürsən ki, bu problem ərəb dövlətlərinin ərazisinə keçsəydi, heç olmasa, Türkiyənin canı qurtarardı...

Bir az əvvəldə dedim ki, Türkiyənin Suriya qovğasında heç bir müttəfiqi yoxdur. Suriya və Rusiya belə hesab edir ki, Türkiyə İŞİD-ə dəstək verir. Elə ABŞ da yaranmış vəziyyətdən məmnunluq duymur - amerikalılar da düşünür ki, Türkiyə həm də PKK-nı hədəf seçməklə onların regiondakı maraqlarına bir növ zərbə vururlar...

Qərəz, vəziyyət belədir. Bir daha deyirik ki, hamının vətən haqqına sayğı ilə yanaşırıq. Türkiyə də vaxtilə bu sayğını nümayiş etdirib - Osmanlı tərkibində olan neçə millətin istiqlal haqqını tanıyıb. Amma türklərin öz haqları, onların da vətən haqqı var. Bu haqqı heç kim onların əlindən almayıb, ala da bilməz və hamı, o cümlədən də Rusiya qəbul etməlidir ki, Türkiyə onu özünə vətən və dövlət hesab edənlərindir...