"Biz istəyirik ki, Avropa, Rusiya və ABŞ-la da əlaqələrimiz möhkəm olsun".

Bu sözləri Axar.az-a politoloq Vəfa Quluzadə Azərbaycanla Rusiya sərhədçiləri arasında keçiriləcək hərbi təlimləri şərh edərkən deyib.

O, Rusiyanın Azərbaycana qarşı neytral mövqe tutmalı olduğunu bildirib:

"Azərbaycanın davranışı tamamilə başadüşüləndir. Biz cəhd edirik ki, Rusiya ilə əlaqələr korlanmasın. Buna səbəb nədir? Ona görə ki, regionda əsas təhlükə Rusiyadır. Faktiki surətdə, görün, nə qədər şeyə göz yumuruq. Biz Rusiya ilə açıq-aşkar müharibə vəziyyətindəyik. Ermənistan Rusiyanın rəsmi müttəfiqidir, bizimlə müharibə vəziyyətindədir. Deməli, İrəvanın ən yaxın müttəfiqi və təhlükəsizliyinin qarantı olan Rusiya da bizimlə müharibə vəziyyətindədir. Buna göz yummuşuq. Əvəzində deyirik ki, Rusiya dostumuzdur, qoy Minsk Qrupu Qarabağı nə vaxt həll edir etsin, biz onunla dost olacağıq. Ona görə Moskva nə təklif edirsə, ona "yox" demirik. Rusiya təklif edir ki, hərbi təlimlər keçirək, biz də bununla razılaşırıq. Vaxtı ilə bir dövlət xadimimiz demişdi ki, biz buterbrod kimi bir neçə dövlətin arasında qalmışıq. İstəyirik ki, Avropa ilə də, Rusiya ilə də, ABŞ ilə də əlaqələrimiz möhkəm olsun. Gərək, Rusiya Azərbaycana qarşı neytral mövqe tutsun. Üstəlik, Rusiya SSRİ-nin rolunu oynamağa başlayıb. Bir az güclənib, neft dolları ilə öz ordusunu təkmilləşdirib, Ukrayna ilə müharibə aparıb və Azərbaycana da hücum çəkmək təhlükəsi yaranıb. Artıq bu barədə danışırlar. Amerika Konqresi bundan narahat olub, qərar qəbul etmək istəyir ki, Azərbaycana hücum olsa, ABŞ onu müdafiə edəcək".

Qeyd edək ki, artıq Azərbaycan hərbi gəmiləri Dağıstan sahillərinə yan alıb. Təlimlərin iyulun 24-də başlayacağı nəzərdə tutulub.