Yanacağın qiymətinin qalxması ilə bağlı mətbuatda gedən yazılar, onlara bildirilən rəylərdən belə məlum olur ki, bu mövzu hələ bir müddət gündəmdən düşməyəcək. İnsanların yaşayışına birbaşa təsir edən bu bahalaşmaya hər kəsin öz yanaşması var.

"Axar.az" saytı bu barədə yazarların da münasibətini öyrənmək istədi.

Mən başqa yerdəyəm

Xalq yazıçısı, AYB-nin sədri Anar:

- Mən başqa yerdəyəm, heç nə deyə bilmərəm, sonra zəng edərsiniz.

Təəssüf ki. sonrakı cəhdlərimiz bəhrə vermədi.

Bilmirəm nə deyim…

Şair Fikrət Qoca:

- Başım çıxmır, mən nə deyə bilərəm?.. Desəm, yaxşı ki, bahalaşıb, onda camaat nə deyər, desəm yox, bahalaşması pisdir… Bilmirəm, mənə onun dəxli yoxdur. Bahalaşma elə bir şeydir ki, bu, hər şeydə özünü göstərir. Amma yəqin ki, bunu iqtisadçılar daha yaxşı bilər... Siz iqtisadiyyat ekspertlərinə zəng edin…

Xəbərim yoxdur

Rəşad Məcid:

- Xaricdəydim, ona görə xəbərim yoxdur. – Və əlavə elədi: - Elə belə də yazarsan…

Hər şey gözləniləndir

Şərif Ağayar:

- Üçüncü, dördüncü dərəcəli ölkələrdə hər şey gözləniləndir. Təəccüblənmədim. Hətta adamların çıxıb televiziyada bu qiymət artımından məmnun olduqlarını deməsi belə, mənə qəribə gəlmədi.

Zəhmət çəksinlər, maaşı artırsınlar

Kulturoloq Aydın Xan:

- Azərbaycan iqtisadiyyatı pik nöqtəyə gəlib çatıb. Amma sonuncu benzinlə bağlı qiymət bahalaşması şəxsən məni çox təəccübləndirdi. Çünki fikirləşirdim ki, qiymət belə tezlikə qalxmayacaq, 7 ilə yaxındır ki, qiymətlər stabil qalırdı. Lakin neft ölkəsi, benzin istehsal edən ölkə olaraq birdən-birə yanacaq məhsullarının qiymətinin 30% qaldırılmasının iqtisadi əsaslarını məmurlar müxtəlif bəhanələrlə bizə çatdırmağa çalışsalar da, fikirləşirəm ki, müəyyən məmurların, o cümlədən inhisarda olan inhisarçı maraqların səbəbindən bu qiymətlər qaldırılıb… Biz müqayisə aparsaq, bu qiymət dünya qiymətlərindən də bahadı. Baxmayaraq ki, insanların maaşı və sosial imkanları aşağıdır.

Hər halda, iqtisadçılar bizdən daha yaxşı bilərlər. İndi isə məmurları sıxışdırmaq lazımdır, dövlətdən tələb etmək lazımdır ki, bu bahalaşmaya uyğun olaraq insanlara köməklik göstərsinlər. Əgər dünya dövlətlərindəki qiymətlərdən söz gedirsə, zəhmət çəksinlər, dünya səviyyəsində də bizə maaş versinlər…