"Rusiya-Azərbaycan-Türkiyə ittifaqı yaradılsa, onun siyasi uğuru çox olmayacaq".

Bu sözləri Axar.az-a açıqlamasında NATO Əməkdaşlıq İnstitutunun rəhbəri Fərrux Məmmədov söyləyib.

O, Rusiya ilə hər hansı ittifaqın Azərbaycana birbaşa təhdid olduğunu bildirib:

"Rusiya imperialist bir dövlətdir və o, keçmiş SSRİ tərkibində olan dövlətlərə müttəfiq deyil, yenidən işğal edə biləcəyi hədəf kimi yanaşır. Rusiya ilə hər hansı ittifaq ölkəmizin gələcək milli təhlükəsizliyinə birbaşa təhdiddir. Rusiya bu kimi ittifaqların yaradılacağı ilə bağlı dezinformasiyalar yaymaqla məşğuldur və bu, sadəcə, onun üçün zaman qazanma mənası daşıyır. Rusiya hazırda düşdüyü durumdan çıxmaq üçün bu və ya digər birliklərin yaradılması ilə özünə yeni müttəfiqlər axtarışındadır. Rusiya üçün Türkiyə bu gün önəmli strateji partnyordur, lakin bu, uzunmüddətli strateji ortaqlıq olmayacaq. Rusiya güvənilir bir tərəfdaş olmadığı üçün onun bu gün Türkiyə ilə apardığı siyasət də mövcud vəziyyətinin diktəsidir. "Rusiya Türkiyə ilə birlikdə Dağlıq Qarabağ məsələsinin həllində hər hansı bir irəliləyiş əldə edə bilərmi" məsələsinə gəlincə isə bu, tamamilə mümkünsüz bir şeydir. Rusiya heç zaman Dağlıq Qarabağ məsələsinin həllində maraqlı tərəf olmayıb və heç bir zaman da olmayacaq. Dağlıq Qarabağ Rusiyanın Cənubi Qafqazda var olma məsələsidir. Buna görə də hər hansı addımın atılacağına və nəticə verəcəyinə inanmaq lazım deyil".

Fərrux Məmmədov bölgədəki mövcud aktivliyə də toxunub:

"Bölgədə bu gün aktivlik müşahidə olunur və Ermənistan tərəfi hər gün demək olar ki, atəşkəsi pozur. Bunun iki səbəbi var. Birinci səbəb odur ki, Ermənistan ictimaiyyətinə Rusiya mesaj verir. Yəni deyir ki, əgər mən olmasam, Azərbaycan sizi işğal edər və Dağlıq Qarabağı geri qaytarar. Digər səbəb isə Azərbaycandır. Rəsmi Moskva bu yolla Azərbaycana mesaj verir ki, hər an, Ukraynada olduğu kimi, müharibəyə başlaya bilərəm. Bizim yeganə yolumuz güclü tərəfdaşlara sahib olmaqdır. Bu gün Azərbaycanın strateji tərəfdasları Gürcüstan, Türkiyə, Avropa Birliyi və NATO olmalıdır. Amerika ilə isə müttəfiqlik möhkəmləndirilməlidir. Bu, bizi Rusiyanın gələcək işğalından qoruyacaq, həm də ölkəmizin gələcək milli təhlükəsizliyini zaminliyə almış olacağıq".