Türkiyə Respublikasının Daxili İşlər naziri Müəmmər Gülər "böyük rüşvət" əməliyyatı çərçivəsində həbs olunan oğlu Barış Gülərin evindən çıxan 1 milyon 200 min dollar pul haqqında danışıb.

"Axar.az" Türkiyə mətbuatına istinadən xəbər verir ki, jurnalist Tolqa İşığa açıqlama verən Gülər oğlunun həbsə layiq olmadığını ifadə edərək, belə deyib:

"Mənim oğlum dünyanın ən təmiz insanlarından biridir".

Baxçaşəhərdəki villanın pulu

Oğlunun evindən çıxan pullar haqqında da danışan Gülər deyib: "O pullar oğlumun Baxçaşəhərdəki villasının satışından əldə edilən puldur. Bütün sənədləri də məhkəmədə təsdiqlənib. Satış əsnasında ipoteka problemi yaranıb. Buna görə də banka qoyulsaydı, qaynağının göstərilməsi mümkün olmayacaqdı. Ona görə də 1 milyon 200 min dollarlıq ipoteka probleminin həll olunması üçün gözləyiblər".