Baza prinsiplərini rədd edən, bir neçə gün öncə “Münaqişənin diplomatik həlli yoxdur” deyən Nikol Paşinyan artıq məcbur olub bu dəfə danışıqlar üçün ABŞ-a yalvarır. Artıq Ermənistan baş naziri kompromislərdən danışır.

Bu sözləri Axar.az-a açıqlamasında Qlobal və Regional Təhlükəsizlik Problemləri Mərkəzinin rəhbəri, politoloq Qabil Hüseynli deyib.

Politoloq bildirib ki, Təhlükəsizlik Şurasının daimi üzvləri, həm də ATƏT-in Minsk Qrupunun həmsədr ölkələri Ermənistanı humanitar atəşkəsə riayət etməyə çağırmalıdır:

“Təəssüf ki, Azərbaycanın beynəlxalq hüquqa riayət edərək işğal edilmiş torpaqlarını geri alarkən xaricdən çoxsaylı təzyiqlər davam edir. Bu təzyiqlərin birini bu günlərdə BMT Təhlükəsizlik Şurasında məsləhətləşmələr zamanı gördük. Təhlükəsizlik Şurasının daimi üzvləri, həm də ATƏT-in Minsk Qrupunun həmsədr ölkələri hazırladıqları bəyanat layihəsinə 1993-cü ildə qəbul edilmiş 822, 853, 874 və 884 saylı qətnamələrə istinadı daxil etmədilər. ATƏT-in Minsk Qrupunun həmsədr ölkələri olan Fransa, Rusiya və ABŞ-ın bu cür qərəzli mövqe sərgiləməsi qəbuledilən deyil. Faktiki olaraq bu ölkələr bu gün Dağlıq Qarabağ və ətrafını Azərbaycanın ayrılmaz ərazisi olaraq tanıyır. Belə olduğu təqdirdə bu cür bir təklifin hazırlanması doğru deyil. Üstəlik onlar bir sıra ölkələrin həmin qətnamələrə istinadın mətnə salınması ilə bağlı təkidli mövqeyini də qəbul etmədilər. 822, 853, 874 və 884 saylı qətnamələr heç bir halda kənarda qala bilməz. Bu qətnamələr Ermənistanın işğalçı ölkə olduğunun bariz sübutudur. Bu reallığı unuda bilmərik.

Bəyanatın ilkin layihəsi indiki mətndən tamamilə fərqlənirdi. Azərbaycan tərəfi qəti mövqe nümayiş etdirərək açıqlamanın birtərəfli olmasının qarşısını almağa nail oldu. Bəyanatların özünə gəldikdə isə ilk olaraq vurğulanmalıdır ki, burada söhbət atəşkəsdən deyil, humanitar atəşkəsdən gedir. Hansı ki, bundan öncə iki dəfə qəbul edilən və hər dəfəsində Ermənistan tərəfindən pozulan humanitar atəşkəs. Əgər bu gün bu təklifi edən ölkələr düşünür ki, Ermənistan humanitar atəşkəs adı altında işğala davam edəcək, Azərbaycan isə bununla barışacaq, yanılırlar. Bu gün Azərbaycan Ordusu öz torpaqlarını işğaldan azad etməyə qadirdir və edir. Humanitar atəşkəsə razı olmağımız bizim humanizm prinsiplərinə olan hörmətimizdən irəli gəlir. Əks təqdirdə heç bir atəşkəsdən söhbət belə gedə bilməz”.