Şuşa şəhəri bütün dünyadan gələn turistlər üçün Qafqazın ən məşhur məkanlarından biri olacaq.

Bunu Axar.az-a müsahibəsində Qırğızıstanın Azərbaycandakı səfiri Kayrat Osmanəliyev deyib.

“Bu şəhəri ziyarət etmək mənə də nəsib oldu. Bu səfərlə bağlı çoxlu təəssürat var. Mən indiyədək Şuşada olmamışdım. Amma mənə bu şəhərin zəngin tarixi haqqında məlumat verildi. Əminəm ki, Şuşa gələcəkdə turistlərin ən çox üz tutduğu məkana çevriləcək”, - o bildirib.

Qarabağın 30 illik işğaldan sonra bərpası mövzusuna toxunan səfir qeyd edib ki, bu gün çox böyük işlər görülür:

“Hiss olunur ki, Şuşaya xüsusi diqqət yetirilir. Əminəm ki, uzun illərdir sərmayə yatırılmayan şəhəri tez bir zamanda müasir infrastrukturlu “ağıllı” şəhərə çevirəcəklər. Axı Şuşa şəhərinin bərpası Azərbaycan Prezidentinin şəxsi nəzarətindədir. Bu, təkcə TDT çərçivəsində haqlı olaraq 2023-cü ildə türk dünyasının mədəniyyət paytaxtı elan edilən Şuşaya deyil, bütün Qarabağa da aiddir. Cəmi 8 ay ərzində tikilən Füzuli Beynəlxalq Hava Limanından çox təsirləndim. Hava limanından şəhər mərkəzinə gedən yol yüksək keyfiyyətli və müasirdir”.