Sammitin keçirildiyi Antalyanın Bələk bölgəsində ciddi təhlükəsizlik tədbirləri təşkil edilib.

Axar.az xəbər verir ki, bu barədə hazırda Antalyada G20 sammitində Azərbaycanı ekspert kimi təmsil edəcək İqtisadi və Sosial İnkişaf Mərkəzinin (İSİM) sədri Vüqar Bayramov məlumat verib.

İqtisadçı alim Beyin İyirmiliyi (T20) sammitinin noyabrın 13-dən işə başladığını bildirib:

"Böyük İyirmiliyin (G20) sammitində iştirak etmək üçün artıq dünyanın aparıcı liderləri Türkiyənin Antalya şəhərinə gəlməkdədirlər. Azərbaycan Prezidenti İlham Əliyevin Antalyaya noyabrın 14-də gələcəyi gözlənilir. Sammit ərəfəsində nəşr edilən və dünyanın aparıcı liderləri də daxil olmaqla iştirakçılar arasında yayımlanan G20 dərgisində İlham Əliyevin "Ümumi strategiyanın formalaşdırılması" başlıqlı məqaləsi də dərc edilib. Qürurverici haldır ki, Azərbaycan prezidentinin məqaləsi dərginin əsas yazılarından biri kimi buraxılışın ön səhifələrində yerləşdirilib. Məqalədə ölkəmizin müstəqillik illərində keçdiyi yol, iqtisadiyyatın diversifikasiyası ilə bağlı məqamlar ilə yanaşı, multikulturalizm kimi digər vacib məsələlər də öz əksini tapıb.

Azərbaycanda həyata keçirilən islahatlar ilə yanaşı, dövlət başçısı Antalya G20 liderlər sammiti konteksində qlobal məsələlər ilə bağlı öz fikirlərini bölüşüb".

İqtisadçı sammitdə dünyanın aparıcı beyin mərkəzlərinin nümayəndələri ilə yanaşı, hökumət və biznes təmsilçilərinin də iştirak etdiyini bildirib:

"Sammit dünya iqtisadiyyatındakı mövcud durumun qiymətləndirilməsi ilə bağlı liderlər üçün xüsusi təkliflər paketi də hazırlayacaq. Antalyada bu istiqamətdə müzakirələr davam edir. Müzakirələr sabah bütün dünya liderləri Antalyaya gələnədək yekunlaşacaq. Bütövlükdə, sammitin heç də asan keçməyəcəyi gözlənilir. Qlobal iqtisadi geriləmə, enerji resurslarının qiymətindəki azalma və Rusiyaya qarşı tətbiq edilən sanskiyalar fonunda dünyanın siyası və iqtisadi xəritəsi heç də aydın görünmür. Bu, artıq burada təşkil edilən ilkin müzakirələrdə hiss edilməkdədir.

Sammitin keçirildiyi bölgədə ciddi təhlükəsizlik tədbirləri təşkil edilib. Hava məkanında daimi olaraq helikopterlərin ucuşu müşahidə edilir. Bələk bölgəsinə giriş və çıxış ciddi şəkildə məhdudlaşdırıb. Təhlükəsizlik yalnız Türkiyə deyil, eyni zamanda, digər aparıcı ölkələrin təhlükəsizlik qüvvələri tərəfindən də qorunur. Artıq liderlərin qalacağı otellər və tədbirin keçiriləcəyi məkan bəllidir. Bütün yollar müxtəlif ölkələrdən olan təhlükəsizlik qüvvələrinin əməkdaşları tərəfindən nəzarətdə saxlanılır".